Засгийн газар 2020 оны арванхоёрдугаар сарын 30-ны өдөр хүүхдийн төлөө фонд байгуулж, 10 тэрбум төгрөгийн эх үүсвэрийг шийдвэрлэсэн. Энэ сангийн хөрөнгийг Хүүхдийн номын сан, Хүүхдийн театр, Хүүхэд, залуучуудын соёл спортын цогцолбор зэрэг хүүхэд залуучуудын хөгжлийг дэмжих байгууллагуудыг шинээр барихад зарцуулахаа мэдэгдсэн. Хүүхдийн төлөө фондын үйл ажиллагааг сэргээж байгаатай холбоотойгоор хуримтлал үүсгэх “Монгол соёл-Монгол хүүхэд” цахим тоглолтыг Монгол Улсын Ерөнхийлөгчийн санаачилгаар зохион байгуулсан. Энэ үеэр 100 гаруй иргэн, аж ахуйн нэгж байгууллага нийт 2 тэрбум 227 сая 408 мянган төгрөг хандивлажээ.
Өнгөрсөн намар Хөдөлмөрийн баатар болсон “Макс” группийн ерөнхийлөгч Д.Ганбаатар “Макс” групп, Сүү компаниараа дамжуулан 100 сая төгрөг хандивласан. Хэнтий аймгийн нутгийн зөвлөлийн залуучууд тэднийг төлөөлж иргэн Мөнхчулуун дуудлага худалдаагаар Монгол Улсын Дархан аварга Б.Бат-Эрдэнийн дээлийг 38 сая 500 мянган төгрөгөөр худалдан авсан. Мөн “Өсөх зоос” компанийн ажилчид нэг өдрийн цалин болох 38 сая төгрөг хандивлажээ. Сонирхуулахад Өсөх зоос компанийг УИХ-ын гишүүн Ч.Ундралын аав Чинбатынх. Хөдөлмөрийн баатар боксчин Э.Бадар-Ууганы бээлийг Макс группийн ерөнхийлөгч Д.Ганбаатар дуудлага худалдаагаар 21 сая төгрөгөөр худалдан авав. “Наран” рестораны захирал Дэлгэр хувиасаа 5 сая, “Их нигүүлсэн” ТББ-аасаа 5 сая төгрөг буюу нийт 10 сая төгрөг, Америкийн жүжигчин Стивен Сегалийн гэр бүлээс хүүгийнхээ нэрээр, МУГЖ Т.Баясгалан хувийнхаа “Сакура” дунд сургуулиасаа 10 сая төгрөг хандивласан байна.
Discussion about this post