1928 оны байдлаар улсын хэмжээнд 700 мянга орчим хүн тоологдсон

АРВАН ДОЛООДУГААР /1928/ ОНЫ БҮХ ХҮН АМ, ХӨДЛӨХ ҮЛ ХӨДЛӨХ ХӨРӨНГИЙГ ТОДОРХОЙЛСОН ДАНС

1928 онд Монгол Улсад явуулсан хүн ам, хөдлөх, үл хөдлөх хөрөнгийг тодорхойлох тооллогын нэг данс нь бичиг эрдэм мэдэхийг тодорхойлсон данс юм.

Хан Хэнтий уулын аймаг, Богд хан уулын аймаг, Цэцэрлэг Мандалын аймаг, Хантайшир уулын аймаг, Дарьганга хошуу, Улаанбаатар Жавхлант Алтанбулаг хот дахь өрх, сум, хошууны тоо, лам нарын тоо, хөвгүүд ба охидын тоо зэргийг хүснэгтлэн бичжээ.

Мөн эдгээрээс бичиг үсэгт тайлагдсан, гадаад хэл эзэмшсэн байдал, аж үйлдвэр эрхэлдэг зэргийг насны байдлаар үзүүлжээ. Ингэхдээ хүйсээр ангилж, 8-18 нас, 18-45 нас, 45-аас дээш нас гэж ялгасан байна.

Уг дансанд тэмдэглэснээр 1928 оны байдлаар улсын хэмжээнд 700 мянга орчим хүн тоологдсоноос монгол бичиг мэдэх 10743, төвөд хэл бичиг мэдэх 17558, орос хэл бичиг мэдэх 335, хятад хэл бичиг мэдэх 76, япон хэл бичиг мэдэх 1, англи хэл бичиг мэдэх 2 хүн, нийт бичиг эрдэм мэдэх хүний тоо 28715 байсан бол 100 хүн тутмын 4.11 хувь нь бичиг эрдэм мэдэх хүмүүс байжээ.