Төмөрийн Дарима хэмээх даруухан боловсролтой бүсгүй ерөнхийлөгч асан Н.Энхбаярын ууган хүү Э.Батшугартай олон жил үерхэж охинтой болсон гэдгийг монголчууд мэднэ. Харин сүй бэлэг, хурим найр болон албан ёсоор гэрлээгүй. Төмөрийн Дарим бэлтэй айлын, мэдлэг боловсролтой охин. Тиймээс Э.Батшугарыг нэг жүжигчин хүүхэнтэй холбогдоход уучлаагүй, эргэлт буцалтгүй явчихсан бардам бүсгүй гэдэг. Гадаадад амьдарч байгаа сураг гардаг ч саяхнаас Европын нэгэн язгууртны хүү болох чинээлэг эрхэмтэй нижгэр хурим хийсэн гэж ярилцдаг нь үнэн байжээ.
Төмөрийн Дарима 2020 оны хоёрдугаар сарын 29-нд буюу 4 жилд нэг удаа тохиолддог өдөр Доминик Жүүрис хэмээх удам угсаа сайтай, язгуур гаралтай эрхэмтэй гэрлэжээ. Хуримаа байгалийн сайхнаараа гайхагддаг Португаль улсын Синтра хотод байрших Сетеаис ордонд зохион байгуулжээ. Хуриманд нь Монгол, Сингапур, Герман, Англи, АНУ зэрэг орон орноос ойр дотны улс нь хүрэлцэн ирж, интернационал хурим болжээ. Сетеаис ордон нь 1783-1787 онуудад баригдсан, ЮНЕСКО-гийн Дэлхийн Өвд бүртгэгдсэн онцгой, тансаг түүхэн ордон аж. Серра де Синтра нурууны орой дээр байрласан энэхүү неоклассик архитектуртай ордноос Синтра хотын алсын бараа, хөдөө нутгийн байгаль бүхэлдээ харагддаг төдийгүй бүх талаасаа өргөн уудам цэцэрлэгт хүрээлэнгүүд, сүрлэг том жимсний модоор хүрээлэгдсэн байдаг нь нүд салгахын аргагүй байдаг гэнэ.
Т.Дарима Монголд төрж өсөөд Пенсильванийн их сургуулийн Wharton хэмээх гарамгай Ivy League бизнесийн сургуулийг дүүргэсэн. Т.Дарима сургуулиа төгссөнийхөө дараа Goldman Sachs хөрөнгө оруулалтын банкинд ажилд орсон анхны монгол хүнээр тодрон карьерээ хөөж явах үедээ Доминиктэй ажлын шугамаар анх танилцаж байжээ.
Харин түүнээс хойш долоон жилийн дараа Лондонгийн гудамжинд санамсаргүй байдлаар тааралдсанаар хайрын түүхээ эхлүүлсэн аж. Т.Дарима чөлөөт цагаараа морь унадаг, Доминик нь поло спортоор хичээллэдэг. Хэн хэн нь уран зураг, урлагт дуртай. Мөн Доминик нь Бельги гаралтай тул хоёулаа хаана ч явсан жижиг орны төлөөлөл байсаар ирсэн гэхчлэн хоорондоо ижил төстэй зүйл олон байсан нь улам ойртуулжээ.
Т.Дарима хуримын ёслолынхоо үеэр үндэсний дээлээрээ гоёсон монгол бүжигчид морин төвөргөөн, монгол эрийн хийморь, тал нутгийн салхи гээд сайхан бүхнийг мэдрүүлсэн “Жалам Хар” бүжгээр зочдыг гайхшруулсан аж. Мөн хөөмий болон морин хуур эгшиглүүлж, уран нугаралт үзүүлэн, нийт дөрвөн ч удаа хувцсаа сольсон үзүүлбэр бэлдэж үндэснийхээ өв соёлыг дээдэлсэн хурим хийсэн байна.
Discussion about this post