Өвөө, аав, хүү гурав

Өвөө, аав хүү гурав. Телевизийн хөтлөгч Я.Учрал найруулагч Ц.Хүсэлбаатарын нууц хүү. Найруулагч, жүжигчин Хүсэлбаатарын аав нь МУГЖ Ё.Цог гуай. Саяхан өвөө, аав, хүү гурав хамт зургаа авахуулсан нь цахим орчинд олны нүдийг хужирлаж байна. Хүний амьдрал ээдрээтэй хойно хожуу төрсөн аав хүү уулзсан. Энэ үеэр

Ц.Хүсэлбаатар хүү Я.Учралдаа “Залуудаа хүний бүсгүй үрийг гомдоож явна гэдгээ ойлгоогүй. Ээж чинь надад их гомдсон байх” гэсэн юм.

Богд хааны дүр, “Цогоо гуай” рекламны дүрээр ард олонд хоногшсон МУГЖ Ё.Цог гуай найруулагч Ц.Хүсэлбаатарын аав. Найруулагч Ц.Хүсэлбаатар, жүжигчин С.Өлзийхүү нар 20 гаруй жил хамтдаа амьдарч, хоёр хүүхдийн аав ээж болсон бат бөх гэр бүл. Ц.Хүсэлбаатар, С.Өлзийхүү хоёрын том охин нь мисс Х.Баярмаа. Мисс Х.Баярмаа СУИС төгсөөд, Америкт боловсролын зэргээ ахиулсан. Одоо аав ээжийнхээ үүсгэн байгуулсан “Шилдэг өнгө” хамтлагт жүжигчин мэргэжлээрээ ажилладаг. Х.Баярмаа нэг эрэгтэй дүүтэй, удам дамжсан урлагийн гэр бүлийн бага хүүг нь урлагийн мэргэжил сонгоогүй бололтой, хүмүүс сайн мэддэггүй.

  Харин найруулагч Ц.Хүсэлбаатар жүжигчин Өлзийхүүтэй учрахаасаа өмнө аав болчихсон байсан. Ц.Хүсэлбаатарын том хүүг Учрал гэдэг бөгөөд “Стар” телевизийн хөтлөгч. “Учиртай урилга” нэвтрүүлэг хөтөлдөг Учрал найруулагч Ц.Хүсэлбаатарын өмнөх амьдралаас гарсан ууган хүү нь бөгөөд одоо төрсөн эцэгтэйгээ тун сайн харилцаатай. Ц.Хүсэлбаатар өмнө нь Б.Янжиндулам хэмээх бага ангийн багш бүсгүйтэй ханилж хөөрхөн хүүгийн аав ээж болцгоосон ч тэдний амьдрал хоёр тийш болсон гэдэг.

“Учиртай урилга” нэвтрүүлгийнхээ зочноор аавыгаа урьсан хөтлөгч Учрал аавтайгаа амьдрал, уран бүтээлийнх нь талаар хөөрөлдсөн юм. “Залуу нас гэхээр та өмнө нь нэг амьдралтай байсан гэсэн” гэх асуултанд “Чи бид хоёр эфирт ийм юм ярих юм уу, болох юм уу” хэмээсэн Ц.Хүсэлбаатар үргэлжлүүлэн

-Идэр залуу насандаа хүний бүсгүй үрийг гомдоож явна гэдгээ ойлгоогүй. Ээж чинь надад их гомдсон байх гэж боддог. Хэлэх хэлэхгүй үг хүний амнаас бас гарна шүү дээ. Хүүгээ олчихлоо гээд ирэхэд нь хэлж болохгүй үгээр гомдоогоод явуулж байсан. Тэрнээс ч болоод бид хоёрын амьдрал нийлээгүй байх гэж аав нь боддог юм. Нэгэнт гомдсон сэтгэлийг эргүүлэхэд хэцүү л дээ. Хожим нь Өлзийхүүтэй уулзаад нэгдүгээрт хүний ганц охин, хоёрдугаарт одоо ухаан суух цаг нь болсон гэдгийг ойлгосон. Залуу насанд хэцүү, хачин ааш гаргаж явсан үе байлгүй яахав хэмээн хариулжээ. Үе үе хоолой зангируулан ярьсан аав нь нэвтрүүлгийн төгсгөлд нууц гэгддэг хүү Я.Учралыг үнссэн нь хүмүүсийн сэтгэлийг хөдөлгөсөн агшин байсан билээ.