Оросын алдартай зөнбилэгч, бөө Дардо Кусто өнөө өглөө Москвагийн нэгэн зочид буудалд нас барсан байхыг олжээ. Түүнийг амиа хорлосон гэж Оросын телевиз, сайтууд мэдээлж байна. 44 настай Дардо сүүлийн хэд хоног буудалд амьдарч байжээ. Тэрээр Оренбург мужид төрсөн ба Москвад үе үе уригдан ирж ажилладаг. Гэхдээ Оросын нийслэлд өөрийн гэсэн орон сууцгүй юм байна. Түүний хамаатны залуу “Дардо танилуудаараа явж хонодог байсан. Би байр хөлсөлдөг болохоор түүнийг гэртээ байлгаж чадаагүй. Хэд хоногийн өмнө түүнийг хонох газар байхгүй гэхэд би 1 буудал санал болгосон. Дардо тэр үед их өөдрөг байсан, мягмар гарагийн өглөө онлайн семинар хийнэ гэж ярьсан юм. Сүүлийн 3 хоног унтаагүй тул орондоо орлоо гэж надад хэлсэн” хэмээн ярилаа.
Зочид буудлын менежер бүсгүй “Өглөө 6 цаг өнгөрч байхад түүний өрөөнд чанга дуу чимээ гарсан тул би айгаад дотогш орж чадаагүй. Ингээд хамаатан руу нь залгаж түүнийг ирмэгц бид картаар хаалга онгойлгож орсон. Аймшигтай дүр зураг харагдсан, Дардо нас барчихсан байсан” хэмээжээ. Харин цагдаа нар “Түүний өрөө дотроосоо түгжээтэй байсан, мөн биеийн байдал ба гэмтлийг судалсны эцэст Дардог амиа хорлосон гэж эмч, шинжээчид урьдчилсан байдлаар дүгнэсэн. Өөрөө өрөөний ханан дээр цусаараа “Би тэртэй тэргүй амьдрах болно” гэж бичсэн байлаа” хэмээн мэдэгджээ.
Дардо Кусто бол удам дамжсан бөө, Орост маш алдартай нэгэн. Түүний аав эдийн засагч, ээж нь удган юм байна. Тэр сэтгэл зүйчийн мэргэжилтэй, бас Англид телевизийн урлагийн сургууль төгсчээ. Дардо Кусто шинжээч, зөнбилэгчийн хувиар ТВ-ийн олон шоунд уригдаж тогтмол оролцдог. Тухайлбал “Үл үзэгдэгч хүн”, “Знаки судьбы”, “Магия еды”, “Суперинтуиция”, “Они и мы”, “Доброго здоровьица!”, “Истина где-то рядом”, “Пусть говорят”, “Х-версии” нэвтрүүлэгт оролцож байсан. Тэр үүний зэрэгцээ хүн үзэж парапсихолог, зөнбилгийн мастер хичээл заадаг байжээ. ![](http://taiz.mn/wp-content/uploads/2021/08/Darddd.png)
![](http://taiz.mn/wp-content/uploads/2021/08/Darddd.png)
Discussion about this post