Өнгөрсөн амралтын өдөр Туркменистан улс олимпын анхны медаль хүртсэн тамирчнаа алдаршуулжээ. Тус улсын 21 настай хүндийн өргөлтийн тамирчин Полина Гурьева Токио 2020 зуны олимпын наадмын эмэгтэйчүүдийн 59 кг-ийн жинд мөнгөн медаль авсан юм.
Анх 1991 онд Зөвлөлт Холбоот Улс задран унасны дараа тусгаар тогтнолоо зарласан Туркменистан Улсын хувьд энэ нь анхны олимпын медаль байжээ. Тусгаар улс болоод 30 жилийн дараа олимпоос анх авсан медалиа сүртэй тэмдэглэжээ.
Туркменистаны Ерөнхийлөгч Гурбангулы Бердымухамедов олимпын анхны медальтай тамирчиндаа шинэ орон сууц, тансаг ангиллын SUV автомашин, 50,000 ам.доллартой тэнцэх мөнгөн шагнал бэлэглэжээ. Энэ өндөр шагналын ерөнхийлөгч Бердымухамедовын хүү Сердар нийслэл Ашхабат хотод болсон ёслолын арга хэмжээний үеэр тамирчинд гардуулжээ.
Анхны олимпийн медальт Полина Гурьева шагналаа гардан авсны дараа талархлын үг хэлэхдээ олимпын мөнгөн медалиа Туркменистаны тусгаар тогтнолын 30 жилийн ойг тохиолдуулан ард түмэн, ерөнхийлөгчдөө зориулж авснаа хэлсэн байна. 
Discussion about this post