ХОРТОЙ МОГОЙД ХАТГУУЛАХААС СЭРЭМЖЛЭЭРЭЙ. Сүүлийн жилүүдэд үерийн усаар дамжиж нийслэлд Бамбай хоншоорт хортой могой ихээр орж ирэх болсон тухай албаныхан анхааруулж байгаа. Иймээс иргэн та “Үндэсний цэцэрлэгт хүрээлэн”-д амарч, зугаалж явахдаа могой харсан тохиолдолд Нийслэлийн байгаль орчны газрын шуурхай удирдлагын төвийн 11323780, 11310005 дугаарт яаралтай мэдэгдэж, дуудлага өгнө үү. Ингэхдээ могойгоор оролдохгүй, уурыг нь хүргэхгүй байхыг анхааруулж байна. Түүнчлэн могойд хатгуулсан бол маш хурдан эмнэлгийн байгууллагад хандах, түргэн иртэл шингэн зүйл ихээр ууж, аль болох хөдөлгөөнгүй байхыг сануулж байна. Энэ могой нь маш хортой, зарим тохиолдолд хүний амь насанд ч хүрэх аюултай юм.Ихэвчлэн хад асгатай газраар амьдардаг, биеийн өнгө нь маш хувьсамтгай, хул шарга юмуу хар хүрэн өнгөтэй байдаг. Нуруу сүүлний дагуу хөндлөн цагаан судалтай, хүүхэн хараа нь босоо хэлбэртэй, нүд хамрын хооронд гүн хонхортой, зэрвэс харахад хамрын дөрвөн сүвтэй мэт харагддаг учир бусад могойноос хялбар ялгагддаг. Иргэн, олон нийт та бүхэн “Үндэсний цэцэрлэгт хүрээлэн”-д амарч зугаалж байхдаа өндөр өвстэй хэсэгт зорчихгүй байх, хортой могойд хатгуулахаас сэргийлэхийг зөвлөж байна.
Discussion about this post