УИХ-ын гишүүн асан Б.Ундармаагийн хамаарал бүхий “Капитал” банк дампуурч хохирол нь 100 тэрбумаар хэмжигдэнэ. Харин хэргийн эзэн, хэнгэргийн дохиур болсон Б.Ундармаа 40 сая төгрөгөөр торгуулаад өнгөрлөө. Сонгинохайрхан дүүгээс НИТХ-д удаа дараа сонгогдож, 2016 онд анх удаа УИХ-ын гишүү болсон Б.Ундармаа улс төр, бизнесийг хоршуулж явж чаддаг эмэгтэй.
Тухайлбал Б.Ундармаа гишүүний “Капитал” банк нь ЖДҮХС-нд өртэй атал “Доктор Мэйк” компаниараа 800 сая төгрөгний зээл авч чаджээ. Тухайн үед Капитал банк нь ЖДҮХС-гийн зээлийг дамжуулан олгож байсан. Гэтэл зээлдэгч нар нь зээлээ төлөхгүй удсан, банк зээлдэгч нартай муу гэрээ хийсэн гэх шалтгаанаар их хэмжээний хүү, алдангийн өр үүсжээ. Энэ нь барагцаалбал 48 тэрбум төгрөгт хүрсэн аж. Тэгвэл энэ байдлыг засах аргыг тухайн үед Сангийн сайдаар ажиллаж байсан Б.Чойжилсүрэн, мөн л тэр үеийн ХХААХҮ-ийн сайд П.Сэргэлэн нар “олжээ”. Энэ нь ЖДҮХС-д бус харин банкинд ашигтай туссан байна. Б.Ундармаа УИХ-ын гишүүн болон ид гялалзаж байх үед буюу 2017 оны 10 дугаарр сарын 10-нд Б.Чойжилсүрэн, П.Сэргэлэн сайд хоёр нийлэн “Капитал” банкны гүйцэтгэх захирал А.Ариунболдтой хүү алдангийг тооцохгүйгээр зээл төлөх хугацааг сунгаж, улмаар үндсэн зээлээс нэг жил чөлөөлөх гэрээ байгуулжээ. Энэ гэрээг нууцын зэрэгт оруулсан гэнэ. Ийм гэрээ байгуулсан атал банк сэхэл авсангүй. Харин ч сахил хүртээд шал дордов гэдэг болж зээлийн хүүг төлөхөө бүрмөсөн зогсоожээ. Жижиг дунд үйлдвэрийг хөгжүүлэх сангийн захирал С.Төгсбилэг үндсэн зээлийг биш юмаа гэхэд ядахдаа хүүг төлөхийг “гуйхад” гишүүн Б.Ундармаа “ … Төгсбилэг ээ, “Капитал банк”-тай холбоотой асуудал бол зүгээр л улс төр шүү. Чи зүгээр хийх ажлаа хий, өгөх юмыг минь өг” гэж уцаарлаж байжээ.
Discussion about this post