Хүн төрөлхтний эв нэгдлийн бэлгэ тэмдэг болсон Токиогийн олимпийн нээлт болохоос хэдхэн цагийн өмнө нээлтийн ёслолын ерөнхий найруулагч ажлаасаа халагдсан байна. Нээлтийн ёслолыг хариуцсан найруулагч Кентаро Кобаяши нь 1998 онд элэглэл хийж байхдаа еврейчүүд, Холокостын талаар хошигносон бичлэг сая олон нийтэд ил болж, түүнийг ажлаас нь чөлөөлжээ.
Олимпийн наадмыг зохион байгуулах хорооны зүгээс дээрхи видео ил болсны дараахан мэдэгдэл хийж, шийдвэрээ танилцуулсан байна. Өмнө нь жүжигчин байсан Кентаро Кобаяши нь бичлэг дээр өөр нэг комедиан буюу элэглэгчийн хамтаар Холокостын тухай ярьж маазарчээ.
Энэ явдалд Токиогийн олимпийг зохион байгуулах хорооны тэргүүн Сейко Хашимото ажлаасаа халагдсан найруулагчийн өмнөөс уучлалт гуйж, Кобаяшигийн өмнөх түүхийг хангалттай сайн судалж чадаагүйдээ хүлцэл өчсөн байна.
Энэ жил 48 настай Кобаяши нь хамтрагчийнхаа хамтаар ихээхэн алдартай элэглэгч комедианууд байсан бөгөөд телевизийн инээдмийн шоунууд дээр ажилладаг байжээ.
Discussion about this post