Билл Гэйтсийн хүүхэд насны талаар аав нь Forbes сэтгүүлд ярилцлага өгчээ. – Билл бага насандаа ямархуу хүүхэд байсан бэ?
– Шинжлэх ухаан, танин мэдэхүй гэх мэт бүх төрлийн ном их уншдаг, бүр хэтэрхий шунаж донтдог хүүхэд байлаа. Энэ байдалд нь санаа зовж бид оройн хоолны ширээн дээр ямар ч ном байлгахыг зөвшөөрөхгүй гэсэн гэрийн дүрэм хүртэл бий болгож байв.
– Тэр ирээдүйнхээ талаар ярьдаг байсан уу?
– Биллийг 5-р ангид байхад нь ирээдүйд хэн болох, ямар мэргэжил эзэмших вэ гэсэн хүснэгт бөглөх даалгавар өгчээ. Хүснэгтэд эмч, гал хамгаалагч, малчин гэх мэт олон сонголтуудаас сурагч аль нэгийг нь бөглөх ёстой байлаа. Билл сансар судлаач болно гэж бөглөсөн ч нэмэлт хүснэгт зураад шинжлэх ухаан гээд биччихсэн байсан. Дэлхийн улсуудын харилцаа, бизнес, олон улсын харилцаа, хүн төрөлхтөний ирээдүй зэргийн талаар хүү минь өсвөр насандаа аль хэдийн өөрийн гэсэн үзэл бодолтой байлаа. Хоолны ширээний эсрэг талд өөдөөс харж суугаад мэтгэлцэх дуртай Билл миний дарга болно гэхэд итгэмээргүй шүү.
– Тэр хэзээнээс компьютерт дуртай болсон бэ?
– Өө бүр багаасаа. Сургуульд нь утасны шугамаар компютертэй холбогдох төхөөрөмжийг худалдаж авах хандивын мөнгийг сурагчдын ээж нар нь өгсөн тэр цагаас л тэр сонирхож эхэлсэн. Тэр төхөөрөмжийг уг нь багш нарынх нь хэрэгцээнд нь зориулсан боловч, тэд хэдэн удаа алдаа гаргаснаас болоод дахин ашиглахаа больсон. Математикийн ангийн хүүхдүүдийг тэр төхөөрөмжийг зөв ажиллуулах талаар суралцахыг уриалснаас үүдэж Билл компьютерт дурдаж, салж чадаагүй юм даа.
– Коллежид суралцахаас өмнө ажил хийдэг байсан уу?
– North Bonneville, Wash-д байрлах цахилгаан станцад хэд хэдэн програмчлал дээр ажиллахын тулд ахлах ангид байхдаа хичээлээсээ чөлөө авч байсан. Биллийн ээж бид хоёр сургуулийн захиралтай ярилцаж тэр ажил нь хүүгийн ур чадвар болон сонирхолд нь сайн туршлага, дэм болно гэдгийг ойлгуулж билээ. Цахилгаан сүлжээний менежментийн кодыг Пол Аллентай шөнөжин сууж бичдэг байсан гэж Билл надад хэлж байсан.
– Билл Харвардаас гарлаа гэхэд танд ямар мэдрэмж төрсөн бэ?
– Санаа зовоогүй гэж хэлж чадахгүй. Гэвч түүний шийдвэрт миний санал тийм ч хүчтэй нөлөөлөхөөргүй байсан. Билл зорилгодоо хүрэх өөрийн гэсэн арга барилтай, Пол Аллентай хамтарч эхлүүлсэн компьютерийн бизнес нь нэлээн хөлөө олчихсон байсан. Тэр юу хийж байгаагаа маш сайн мэддэг байсан.
Орчуулсан: Т.Баярбаясгалан
Discussion about this post