Солонгосын нэрт жүжигчин Lee Byung Hun Холливудад очин Майкл Дугласын эхнэр Кетрин Зета Жонсын хамтран тоглосон, мөн “Vogue” сэтгүүлийн нүүрэнд хамтдаа гарсан удаатай. Хэдэн жилийн өмнө нүсэр хурим хийж, одоо ч дуулиан нь тасраагүй байна. Алдарт жүжигчин Lee Byung Hun өөрөөсөө 12 насаар дүү гэргийтэйгээ амьдрах байраа сонгожээ. Тэрээр 5 сая долларын үнэтэй 15 өрөө бүхий, том усан сантай 3 давхар хаусыг Сөүл хотын төвд авчээ. Үүгээр ч тогтохгүй хосуудын хуримын бөгжний үнэ ч олонд ил болжээ. Оддын зүүсэн ээмэг, өмссөн шаахай хүртэл сонин байдаг болохоор солонгосын сэтгүүлчид Lee Byung Hun-ыг хосоор нь манай ханшаар 150 сая төгрөгөөр хос бөгж авсныг илрүүлжээ. Хуримын бөгж нь оддын жишгээр алмазан шигтгээтэй цагаан алтан бөгж сонгосон байна.
Солонгосын алдарт жүжигчин Lee Byung-ийн эхнэр мэргэжил нэгт Lee Min-Jung Холливудад мөрөө гаргасан, Ази даяар алдартай жүжигчинтэй гэрлэж байгаа залуу жүжигчин бүсгүйн азтайг нь гайхах хүмүүс олон байна. Нас нь 40 гарсан, авъяас чадвараараа чамгүй мөнгө хураасан залуу хуримандаа асар их мөнгө заржээ. Солонгосын баячуудын амьдардаг “Ганнам” дүүргийн хамгийн үнэтэй тансаг зочид буудалд өндөр хамгаалалт дор хуримаа хийжээ. Сүйт бүсгүйгээ ёстой л бүлтийтэл гоёно гэдэг болсон бололтой. Хуримын даашинз нь 80 сая вон хүрнэ, толгойн чулуун зүүлт нь 10 сая вон элбэг хүрнэ гэж эд мэддэг хүмүүс тооцоолж байна. Мэргэжил нэгт хосуудыг бие биедээ ихэд тохирсон гэж солонгосчууд үнэлдэг. Солонгосын алдарт жүжигчин Lee Byung-Hun бидний сайн мэдэх “Амьдралын ээдрээ” киноны гол дүр Ин Хагийн дүрд тоглож монголчуудад танигдсан.
1970 онд төрсөн Lee Byung-Hun “Амьдралын ээдрээ” кинонд хамтран тоглосон хөөрхөн бүсгүйтэй хоёр жил гаруй үерхсэн ч, найз бүсгүйнх нь аав ээж хүлээн зөвшөөрөөгүй учраас хоёр тийш болсон. “Зочид буудлын эзэн”, “Миний байшин” киноны гол дүрд тоглосон хөөрхөн бүсгүйг монголчууд Юнхи гэж нэрлэдэг. Юнхи 1982 онд төрсөн, Ин Ха 1970 онд төрсөн 12 настай зөрөөтэй болохоор охины аав ээж нь насны зөрөө их гээд зөвшөөрөөгүй гэдэг. Ин Ха ч, Юнхи ч гэрлээгүй хэдэн жил болсон. Харин сүүлийн 1-2 жил болзсон бүсгүй болох өөрөөсөө мөн л 12 насаар дүү залуу жүжигчин Lee Byung-Hun-тэй хуримлаж байна. Хурим нь хаалттай болсон бөгөөд фенүүд нь хуримлаж байгаа ордныг тойроод эргэлдэж байсан гэдэг. Зөвхөн Японоос гэхэд 300 гаруй фен нь зорин очин сонирхож байгаа гэнэ. Хуримынхаа өдөр Ин Ха хэвлэлийнхэнтэй хальт уулзахдаа эхнэрийнхээ духыг үнсээд “Сайхан байна. Сэтгэл хөдөлж байна. Бид хэдэн хүүхэдтэй болохоо төлөвлөөгүй. Хоёр, гурав, ер нь хэдэн хүүхэд гарсан ч бурхны бэлэг болохоор талархсан сэтгэлээр өсгөнө” гэж хэлжээ.
Л.ХАТАН WWW.TAIZ.MN
Discussion about this post