Байгуулагдаад удаагүй Соёлын яам сайдаасаа эхлээд олны хэл ам таталсан, эрдэмтэн мэргэддээ ч хүлээн зөвшөөрөгдөөгүй нэг нөхөр болоод байна. Соёлын сайд С.Чулуун анх МАН-ын дарга Миеэгомбын Энхболдыг мандаж явахад нэг нутаг гээд хажуунаас нь салдаггүй байсан гэдэг. Одоо Төрийн тэргүүний төрсөн дүү мэт төө зайгүй явах болсон аж. Соёлын сайд С.Чулуун архивын сан хөмрөгөөс зарсан гэх асуудлаас гадна соёлын ойлголт нь ч УИХ-ын хүрээнд эргэлзээ төрүүлэх болсон. Учир нь УИХ-ын цорын ганц бие даагч гишүүн, танхим удирдаж явсан Ерөнхий сайд асан Н.Алтанхуяг энэ яамыг байгуулахад дэмжих санал өгч байсандаа харамссан удаатай.
Тэгвэл Соёлын яамны ажилтнууд нь хүртэл соёлын ерөнхий мэдлэггүй болж таарчээ. Тус яамны Төрийн нарийн бичгийн дарга Г.Эрдэнэбатын тушаалаар яамны нийт албан хаагчдад түүх соёлын үл хөдлөх дурсгал болон түүх, соёлын дурсгалт зүйл, соёлын биет бус өв, музейн дэглэлтийн талаар ерөнхий мэдлэг олгох, түүх соёлын дурсгалт газартай биечлэн танилцах сургалтыг зохион байгуулж үүнд 13,9 сая төгрөг зарцуулжээ. Үүнээс харахад Соёлын яам анхнаасаа хүний нөөц, боловсон хүчнээ сонгон шалгаруулахдаа соёлын ерөнхий мэдлэгтэй хүмүүсийг ажилд аваагүй нь харагдана. Тэгээд ч ганц хоёрхон хоногийн сургалтаар ерөнхий мэдлэг авсан ажилтнууд нь төр улсын соёлыг хөгжүүлэхэд мэргэжил чадвар дутах нь мэдээж. Хамгийн хачирхалтай нь яамны ажилтнууд цэцэрлэг, сургуулийн хүүхдүүд шиг бөөнөөрөө түүх соёлын дурсгалтай газартай танилцсан байна. Ийм л сайд нь гэж хэрүүл маргаанд өртөмтгий, ажилтнууд нь мөнгө үрэмтгий нэг шинэ тутам яамтай болсон бололтой.
Discussion about this post