Перугийн Лима хотноо болсон APEC-ийн уулзалтын үеэр БНХАУ-ын Ерөнхийлөгч Ши Жиньпин ирэх нэгдүгээр сард Цагаан ордныг орхихоор байгаа Жо Байдентай уулзаж ярилцахдаа хоёр улсын хооронд “шинэ хүйтэн дайн” эхлэх ёсгүйг, мөн зөрчил мөргөлдөөнөөс зайлсхийх боломж байгаа”-г онцолжээ.
Ингэхдээ Дональд Трампын давж болохгүй “4 улаан шугам” БНХАУ-д байгааг анхааруулсан байна.
Тухайлбал: Коммунист намын эрх мэдлийг сулруулах, БНХАУ-ыг ардчилсан засаглал руу шахах, эдийн засгийн өсөлтийг нь хяхаж хавчих, Тайванийн тусгаар тогтнолыг дэмжих гэсэн дөрвөн алхмаас Дональд Трамп зайлсхийх ёстой гэжээ.
Ши Жиньпин “АНУ, БНХАУ урт хугацаанд энхтайвнаар зэрэгцэн оршихыг хичээх ёстой. Хүн төрөлхтөнд хүндрэл бэрхшээлийг даван туулахад туслахын тулд “Эв санааны нэгдэл, хамтын ажиллагаа” хэрэгтэй. Хамтын ажиллагааг салгах, нийлүүлэлтийн сүлжээг тасалдуулах нь зөв шийдэл биш” гэж, харин Жо Байден “Хоёр талын харилцаанд ахиц дэвшил гарсанд талархаж байна. “Яриа хэлэлцээрийн үр дүнд хоёр улсын хооронд үл ойлголцол үүсэхээс сэргийлж, өрсөлдөөн нь зөрчилдөөн болж хувирахгүй байх баталгаа болж байна” гэсэн байна. Хоёр орны ерөнхийлөгч батлан хамгаалах, хиймэл оюуны эрсдэл, хар тамхины эсрэг хамтын ажиллагаа сайжирсныг тэмдэглэжээ.
Энэ удаагийн уулзалтаар Ши Жиньпин АНУ-ын холбоотон улсуудтай хэлэлцэж, БНХАУ олон улсын худалдааны системийг хамгаалахыг зорьж байгаа нь анзаарагдсан байна.
Discussion about this post