Америкийн “Алтан охин”

Шидэт дохиуртай юм шиг гар хүрсэн бүхэн нь мөнгө болдог хүн байна. Тэдний нэг бол “Алтан охин” Америкийн поп од Тэйлор Свифт. Нэг тоглолтоос 10-13 сая ам,доллар олж, мөнгийг шуудайлах болсон. Сайныг дагавал сарны гэрэл гэгчээр түүнтэй нэр холбогдвол сүр нөлөөний хүчээр орлого олж байна. Тейлор Свифттэй нэр холбогдсон нэг тамирчин залуугийн орлого эрс өсжээ.

 NFL-ийн Kansas City Chiefs багийн тоглогч Трэвис Келси дуучин бүсгүйтэй нэр холбогдох болсон. Тейлор Свифт багийнх нь тоглолтыг хөгжөөн дэмжихээр Келсигийн ээж Доннатай цуг Arrowhead Stadium-д ирсэн нь энэ дам яриаг улам бататган эрчимжүүлжээ.

Үүний үр дүнд тамирчин Трэвис Келситэй холбоотой бүх зүйлийн үнэ ханш эрс өссөн байна. Тухайлбал энэ тамирчны Инстаграм хуудасны дагагчийн тоо тэр даруй хагас сая гаруйгаар нэмэгджээ.

Мөн Келсигийн нэр, дугаартай өмсгөл, дуулга зэргийн борлуулалт 4 дахин өссөн байна.

Төрсөн ах Жэйсоны хамт хөтөлдөг Келсигийн “New Heights” подкастын хандалт эрс өсөж, Apple Podcast платформын хамгийн өндөр үзэлт, хандалттай шоу болжээ.

Nike, Pfizer, State Farm зэрэг том компаниудтай сурталчилгааны гэрээтэй ажилладаг Келсигийн сошиал дагагчийн тоо одоо 3.4 саяд хүрснээр үнэлгээ нь бас өсөх боломжтой болж байна.

Спорт маркетингийн OpenSponsorship компанийн үзэж байгаагаар түүний сошиал медиа үнэлгээ нь өмнөхөөсөө “3-5” дахин өсөх боломжтой болсон гэнэ.

“Тэйлор Свифтийн фэнүүдийг татах болсноор Трэвистэй хамтарч ажилладаг брэндүүдийг сонирхох сонирхол нэмэгдэж эхэлснийг бид харж байна” гэж тус компанийн гүйцэтгэх захирал Айшвин Жолли бичжээ.

Тэйлор Свифт нь өөрөө зөвхөн Инстаграм платформд 272 сая дагагчтай юм. Энэ дагагчдын тодорхой хэсэг нь Келсиг дагахад л үнэлгээ нь эрс өсөх юм байна.

Свифтийн эдийн засгийн нөлөөг асар том гэж судлаачид үздэг. Түүний Eras Tour аялан тоглолт АНУ-ын эдийн засагт $4.6 тэрбумын хэрэглээний зардал үүсгэсэн гэх тооцоолол бий. Аялан тоглолтынхоо дараа түүнийг тэрбумтан болно гэж үздэг.

Свифттэй нэр холбогдсон зүйл бүхэн “алт болдог” цаг иржээ.

Тухайлбал энэ оны дөрөвдүгээр сард дуучин бүсгүй $673-ын үнэтэй жинсэн өмдтэй олны нүдэнд харагдсаны дараа уг өмд олдохоо больсон тухай Billboard сэтгүүл мэдээлж байв.

()