Шведын вант улсын Лунд хотод 2023 оны 07 сарын 15-21 өдрүүдэд зохион байгуулагдсан Европын охидын мэдээлэл зүйн олимпиад (EGOI 2023)-д Монгол улсыг төлөөлөн оролцсон баг хоёр багш, дөрвөн оролцогчийн бүрэлдэхүүнтэйгээр амжилттай оролцоод эх орондоо ирлээ.
Багийн бүрэлдэхүүн:
| Үүрэг | Оролцогчийн овог, нэр | Ажил, сургууль |
| Багийн ахлагч | Жанцансамбуугийн Дашдэмбэрэл | МУБИС-ийн Мэдээлэл зүйн тэнхимийн багш |
| Багийн дэд ахлагч | Ивановын Бямбасүрэн | МУИС-ийн Мэдээлэл, компьютерын ухааны тэнхимийн багш |
| Оролцогч сурагч | Мөнхбаярын Амин-Эрдэнэ | Эрхэт-Эрдэм сургуулийн 10 дугаар ангийн сурагч |
| Баттулгын Аминжин | АНУ, Калифорниа мужийн Хенри М Ган ахлах сургуулийн 10-р ангийн сурагч | |
| Олонбаярын Ному-Луун | Оюунлаг сургуулийн 10-р ангийн сурагч | |
| Мөнхбатын Сувд | Олонлог Эгзэ сургуулийн 7-р ангийн сурагч |
Энэ удаагийн олимпиадад 5 тивийн 52 улсаас хүрэлцэн ирсэн 189 оролцогч хоёр өдрийн турш 8 бодлого бодож программчлалын ур чадвараа сорьж өрсөлдөв. Монгол улсыг төлөөлөн оролцсон М.Амин-Эрдэнэ нийт 192 оноо авч тусгай байранд шалгарсан юм. Оролцогчдын оноог хүснэгээр харуулбал:
| Д/д | Нэр | Эхний өдөр /оноо/ | 2 дахь өдөр /оноо/ | Нийт оноо |
| 1 | М.Амин-Эрдэнэ | 45 | 147 | 192 |
| 2 | О.Ному-Луун | 81 | 81 | 162 |
| 3 | Б.Аминжин | 61 | 47 | 108 |
| 4 | М.Сувд | 62 | 17 | 79 |
Европын охидын мэдээлэл зүйн олимпиадыг 2021 оноос эхлсэн зохион байгуулж байгаа бөгөөд Монгол улс өнгөрсөн жилээс эхлэн оролцож эхэлсэн бөгөөд энэ жил 2 дахь удаагаа оролцож байгаа юм. Уг олимпиадад оролцох багийг бүрдүүлэхдээ улсын мэдээлэл зүйн олимпиадад амжилттай оролцсон эмэгтэй сурагчдаас тодруулдаг.
Европын охидын мэдээлэл зүйн олимпиад (EGOI) нь компьютерийн шинжлэх ухаан сонирхдог залуу эмэгтэйчүүдийн дунд зохион байгуулж, нэг долоо хоног үргэлжилдэг олон улсын тэмцээн юм. Олимпиад нь хоёр өдөр үргэлжилдэг бөгөөд оролцогчид алгоритмын бодлого бодож өрсөлддөг юм. Уг олимпиадад оролцох нь оролцогчдод компьютерийн шинжлэх ухаан сонирхдог бусад улс орны охидтой харилцах, зохион байгуулж буй улсын соёл, ёс заншил, ахуй орчинтой танилцах зэрэг ач холбогдолтой юм. Оролцогч улсын баг 20-оос доош насны дөрвөн эмэгтэй оролцогч, хоёр дасгалжуулагч байж болдог.
EGOI-ийн хөтөлбөр нь IOI (Олон улсын мэдээлэл зүйн олимпиад) зэрэг уламжлал болгон зохион байгуулагддаг олимпиадуудтай төстэй бөгөөд гол ялгаа нь зөвхөн эмэгтэйчүүдийн оролцоо нээлттэй байдаг явдал юм.
Ирэх жилийн Европын охидын мэдээлэл зүйн олимпиадыг Нидерландын вант улс 2024 оны 07 сарын 21-27 өдрүүдэд зохион байгуулахаар сонгогдов.
Монгол улсын багийг бүрдүүлж олон улсын мэдээлэл зүйн олимпиадад оролцуулах ажлыг Монголын мэдээлэл зүйн тооцоолол нийгэмлэг НҮТББ буюу Монголын мэдээлэл зүйн олимпиадын хороо зохион байгуулж ажилладаг билээ.
Монголын мэдээлэл зүйн тооцоолол нийгэмлэг НҮТББ
()
Discussion about this post