Хөгжлийн банкнаас “Сэлэнгийн герефорд” ХХК-д 4.1 тэрбум төгрөгийн зээл олгосон ч өнөөдөр тухайн компанийн эзэн нь олдохгүй, хэдэн үхэр л үлдсэн байна гэж Хөгжлийн банкийг шалгах УИХ-ын Ажлын хэсгийн ахлагч мэдэгдлээ.
Хөгжлийн банкны асуудлаар УИХ нээлттэй сонсголын үеэр УИХ дахь Хөгжлийн банкийг шалгах ажлын хэсгийн ахлагч Б.Баттөмөр “Хөгжлийн банкнаас зээл авсан “Сэлэнгийн герефорд” компани олдохгүй байгаа. Эзэн нь олдохгүй, баахан үхэр байна. Үүнийг АТГ-т өгч шалгуулах нь зүйтэй гэж үзэж байна” гэлээ. Тус зээлийг Хөгжлийн банкны гүйцэтгэх захирал Б.Батбаярын үед олгосон байна.
“Сэлэнгийн герефорд” ХХК нь мах бэлтгэлийн кластерын хүчин чадлыг нэмэгдүүлэх төсөл хэрэгжүүлэхээр 2018 онд Хөгжлийн банкнаас 4.1 тэрбум төгрөгийн зээл авчээ. Зээл авснаас хойш ердөө 326 сая төгрөгийг төлсөн. Одоо үндсэн зээл, хүүгийн өр төлбөр, торгууль нийлээд 5.5 тэрбум төгрөг болоод байгаа аж.
Улсын бүртгэлээс тухай компанийн мэдээллийг үзвэл Лханаажавын Баянбаатар гэх хүн эзэмшиж, гүйцэтгэх захирлаар Польшийн иргэн Michal Grzegorz ажилладаг байна.
Түүнчлэн тус компани 2018 оны дөрөвдүгээр сард Сэлэнгэ аймгийн мал аж ахуйн салбарын эдийн засгийн үр өгөөжийг дээшлүүлэх зорилгоор герефорд үүлдрийн өсвөр насны үржлийн 20 бухыг жил бүр нийлүүлэх хамтын ажиллагааны санамж бичигт гарын үсэг зурах үеэр Гүйцэтгэх захирлаар Г.Галсанням гэх хүн ажиллаж байжээ.
Discussion about this post