1959 оны хоёрдугаар сард хойд Уралын нуруунд Игорь Дятловаар ахлуулсан аялагч оюутнууд учир битүүлгээр бүгд амь үрэгдсэн явдал ХХ зууны хамгийн аймшигтай, нууцлаг түүхийн нэг болж үлдсэн юм. Даваан дээр хоноглож байсан эрүүл чийрэг, бадриун биетэй есөн залууг шөнө дөлөөр майхнаас гүйн гарч аймшигт үхэлтэй тулгарахад юу хүргэв гэдэг нь одоо болтол тайлагдаагүй.
ЗХУ-ын Политехникийн Институтийн аялагч оюутнууд Уралын нурууны зүг явган аялал-цана хослуулсан аялал хийсэн юм. Тэд зүгээр ч нэг оюутнууд байсангүй. спорт алхалт, цанын спортоор хичээллэдэг, спортын 2-р зэрэгтэй тамирчид байсан юм. Гэвч 10 аялагчийн 9 нь амьд эргэж ирээгүй юм. Цорын ганц амьд үлдсэн хүн нь Юрий Юдин бөгөөд замын дундаас өвдсөн учраас буцжээ. Юрий Юдин бол Дятловоор удирдуулсан аялагчдыг хамгийн сүүчийн удаа амьд харсан хүн болно. Майхан дотор аялагчдын хэрэглэж байсан хувцас хэрэглэл, хоол хүнс бүгд байв. Харин өөрсдөө байсангүй. Майхны гадуур хөлийн мөрүүд байх бөгөөд сонирхолтой нь зарим нь оймсгүй, зарим нь оймстой, зарим нь өрөөсөн гуталтай майхнаасаа гарсан байв. Одоог хүртэл 60 гаруй жилийн турш энэхүү аялал аймшигт нууцаа хадгалсаар иржээ.
Энэхүү түүхэн үйл явдлаас сэдэвлэн “Дятловын даваа” найман ангит кино бүтээсэн. Энэ кинонд нэг монгол хүн тоглосон МУГЖ Ё.Цог гуай. Тэрбээр Уралын нуруунд амьдардаг уугуул иргэн, мэргэн бөө Мансын дүрийг бүтээсэн юм.
Discussion about this post