Африкт вакцины оронд ус тарьж төлбөр авч байжээ

Африкийн Кени улсын эмч нар коронавирусийн эсрэг вакцины оронд ард иргэддээ ус тарьж тэр бүү хэл үүний төлөө мөнгө төлөхийг шаардсан тухай барууны хэвлэлүүд  мэдээлж байна. Уг нь энэ улсын иргэд Швед-Английн “AstraZeneca” вакциныг үнэ төлбөргүй хийлгэх ёстой тухай Засгийн газар нь мэдэгдсэн билээ. Гэвч Кенид маш олон хүн вакцинжуулалтад хамрагдахыг хүссэн тул вакцины хомсдол үүсчээ. Зарим эмч үүнийг далимдуулж иргэдэд төлбөртэй вакцинжуулалтыг санал болгож эхэлсэн байна, тэгээд төрийн зөвшөөрөлтэй тусгай эмнэлгийн төвүүдэд хүмүүст ус тарьсан хэрэг дэгдсэн аж. “Вакцин хийлгэхдээ мөнгө бүү төл, мөн үнэгүй вакцин иртэл хүлээ” хэмээн Кени улсын сайд нар уриалж байна. Эрх баригчид иймэрхүү луйврыг таслан зогсоохоор эрүүгийн хэрэг үүсгэн шалгаж эхэлсэн байна.
Өмнө нь Эквадорын цагдаа нар мөн иймэрхүү луйвар илрүүлсэн юм. Тус орны нэгэн эмнэлэг коронавирусийн эсрэг хуурамч вакциныг олон арван мянган хүнд хийсэн хэрэг гарчээ. Хаана, хэн үйлдвэрлэсэн нь үл мэдэгдэх вакциныг Эквадорын эмч нар 15 доллараар тарьж, “COVID-19-н эсрэг энэ вакцины 3 тунг хийлгэвэл эсрэг биет үүснэ” гэж амлаж байжээ.