Улаанбаатар хот үүсэн байгуулагдсаны 380 жилийн ой 2019 оны 10 дугаар 29-нд тохиож, энэ ойг 3 тэрбум төгрөгөөр нижгэр тэмдэглэсэн байна. Тэр үед Хотын дарга С.Амарсайхан байсан. Тэрбээр 22 тэрбумаар дүүжин тээвэр, 3,2 тэрбумаар усан оргилуур барьж мөнгөөр туйлдаг байлаа. Ард иргэдийн цалин сая хүрэхгүй төгрөгт эргэлдэж байхад төрийн албаны машин унаа, тендер тэрбумаар яригддаг боллоо.
Сүүлийн үед цэргүүд нь даргадаа зодуулж амиа алдаж, эсвэл даргаа буудан хороож, 7 хоногийн дараа халагдах цэрэг амиа хорлосон хэрэг гарч, олон нийтийн шүүмжлэлд өртөөд БХЯ-ны 100 жилийн ой саяхан болсон. Батлан хамгаалах яам ой тэмдэглэх, хүндэтгэлийн хүлээн авалт хийх, УИХ-ын гишүүдэд хүндэтгэл үзүүлэх, яамдын Төрийн нарийн бичгийн нарыг цэргийн гутлаар хангах, чөлөөнд байгаа генералуудад орон сууцны дэмжлэг үзүүлэх зэрэгт ихээхэн хөрөнгө зарцуулдаг аж. Харин хэдэн бор цэрэг, цэргийн албан хаагчдын алба хаах нөхцлийг сайжруулах, дэглэлт, оны ялгааг арилгахад анхаарахдаа хойрго.
Юутай ч өнгөрсөн 3-р сард тэмдэглэж өнгөрүүлсэн Зэвсэгт хүчний 100 жилийн ойд нэг тэрбум тавин есөн сая төгрөг зарцуулахаар сайд Н.Сайханбаярын тушаал гарсан байдаг. Үүнээс ой тэмдэглэхэд шаардлагатай тоног төхөөрөмж худалдан авахад 50 сая, ойн медаль хийлгэхэд 75 сая төгрөг зарцуулсан байна. Ойн баярын хурлын хурал, хүндэтгэлийн тоглолтонд 49 сая төгрөг төсөвлөжээ. Зургийн цомог гаргах, ном бүтээхэд бараг 100 сая төгрөг тавигдсан ажгуу. Ерөнхийлөгчийн нэрэмжит марш-тактикийн тэмцээнд 21,6 сая, Ерөнхий сайдын нэрэмжит буудлагын тэмцээнд 19 сая төгрөг төсөвлөгдсөн бол цэргийн албан хаагчдын алба хаах нөхцлийг сайжруулахад тусламжийн хөрөнгө оруулалт болон бусад эх үүсвэрээс тодорхойгүй тооны зардал тавигдаад өнгөрчээ. Ерөнхий сайдаар У.Хүрэлсүх ажиллаж байх үед энэ сайхан санааг гаргаж, Хурандаагийн нэрэмжит буудлагын тэмцээн болгохоор төлөвлөсөн ч оронд нь Л.Оюун-Эрдэнэ болж төлөвлөгөө нурсан гэсэн яриа гарч байна лээ. 
Discussion about this post