Дарга нарын тансаглал хэрээс хэтэрч, иргэдийн амьдрал улам уруудсаар. Энэ хэрээр төрийн албанд попролт ихэссээр, улам бүр газар авч байна. Тэд ажиллахаас илүүтэй гаргасан шийдвэрээ сурталчлахад анхаарч, төсвийн хөрөнгийг үр ашиггүй зарцуулж байна. Сурталчилгааны цаана дарга нар өөрсдийгөө таниулах, нэр хүндээ өсгөх далд санаа давхар агуулагдаж байдаг. Нийслэлийн Баянзүрх дүүргийн ИТХ-ын 1 дугаар хуралдаанаар дүүргийн ЗДТГ-ын байрыг хүүхдийн эмнэлэг болгохоор шийдвэрлэжээ. Харин энэхүү шийдвэрийг иргэдэд сурталчлан таниулах ажилд 980 мянга буюу бараг сая төгрөгний зардлыг төсвөөс гаргажээ.
Манайд сургууль эмнэлгээс илүүтэйгээр яам, тамгын газар цагдаа цэргийхний байр сав өндөр тансаг, гоё ганган, басхүү хурдан хугацаанд баригдаж буйг иргэд шүүмжилдэг. Төрийн албаны том обьектуудыг олон нийтийн хэрэгцээнд шилжүүлэх нь хийгдэх ёстой л ажлын нэг байсан. Харин үүнийг далимдуулаад Баянзүрхийн ИТХ-ын төлөөлөгчид, дарга нар хажуугаар нь “попорчээ”. Дүүргийн Тамгын газрын байрыг 100 ортой хүүхдийн эмнэлэг болгох шийдвэрийг өмнөх ИТХ-ын үед АН олонхи байх үед гаргасан. Харин одоогийн дарга нар тэрхүү шийдвэрийг сая шахам төгрөгөөр сурталчилсан нь энэ ажлыг өөртөө наахаар шийдсэн гэх хардлагыг төрүүлж байна.
Discussion about this post