Хамтран амьдрагчтайгаа гэртээ архидан согтуурч хоорондоо маргалдан цохиж амь насыг нь хохироожээ

Хамтран амьдрагчтайгаа гэртээ архидан согтуурч хоорондоо маргалдан цохиж амь насыг нь хохироожээ.

Шийдвэрийн дугаар: 2023 оны 11 дүгээр сарын 20-ний 407 дугаартай

Магадлалын дугаар: 2024 оны 01 дүгээр сарын 17-ны өдрийн 03 дугаартай

Шийдвэрийн төлөв: Хүчин төгөлдөр болсон

Иргэн Б нь гэртээ согтууруулах ундааны зүйл хэрэглэж хамтран амьдрагч Л-тэй маргалдан Л-ийн толгой нүүр, биеийн хэсэгт хөлөөрөө өшиглөх, модоор олон удаа цохиж, гавал тархины битүү гэмтэл учруулан амь насыг нь хохироожээ.

Прокуророос Б-г хүнийг санаатай алах гэмт хэрэг үйлдсэн гэж яллах дүгнэлт үйлдэн хэргийг шүүхэд шилжүүлсэн байна.

Эрүүгийн хуулийн 10.1 дүгээр зүйлийн 1 дэх хэсэгт хүнийг санаатай алсан бол 8 жилээс 15 жил хүртэл хугацаагаар хорих ялаар шийтгэхээр хуульчилсан.

Анхан шатны шүүх шүүгдэгч Б-г бусдыг санаатай алах гэмт хэрэг үйлдсэн гэм буруутайд тооцож 12 жилийн хорих ялыг нээлттэй хорих байгууллагад эдлүүлэхээр шийдвэрлэжээ.

Шүүгдэгч болон түүний өмгөөлөгч ял шийтгэлийг хөнгөрүүлж өгнө үү гэсэн агуулгатай давж заалдах гомдол гаргаснаар давж заалдах шатны шүүх Б-д холбогдох хэргийг хянан хэлэлцээд шүүгдэгч Б г согтуугаар гэмт хэрэг үйлдсэн, урьд нь хамтран амьдрагчаа зодож хөнгөн хохирол учруулж торгох ялаар шийтгүүлж байсан зэрэг түүний хувийн байдлуудыг нь харгалзан үзээд анхан шатны шүүхээс шүүгдэгчид оногдуулсан хорих ялын хэмжээг хөнгөрүүлэн өөрчлөх үндэслэл тогтоогдохгүй байна гэж дүгнэж шүүгдэгч Б-гийн болон түүний өмгөөлөгчийн давж заалдах гомдлыг хэрэгсэхгүй болгож, шийтгэх тогтоолыг хэвээр үлдээсэн байна.

Б-гийн Л-ийг цохиж зодсон үйлдлийн улмаас амь хохирогч тархиндаа гэмтэл авч нас барсан байх ба Б нь өөрийн үйлдлийн нийгэмд аюултай шинж чанарыг ухамсарлаж, түүнээс учирч болох хүн нас барах хохирлыг хүсээгүй боловч үйлдлээрээ уг хохиролд хүргэсэн гэм буруугийн санаатай хүнийг алах гэмт хэргийн шинжийг бүрэн хангасан байна.

Орхон аймгийн Эрүүгийн хэргийн давж заалдах шатны шүүхийн магадлалын дэлгэрэнгүйтэй холбоосоор танилцана уу.

Хураангуй бэлтгэсэн: Орхон аймгийн Эрүүгийн хэргийн давж

заалдах шатны шүүхийн шүүгч С.Цэцэгмаа