Ерөнхий сайд Л.Оюун-Эрдэнэ өнөөдөр ТОП-100 аж ахуйн нэгжийн захирлуудтай уулзсан. МҮХАҮТ-д болсон уулзалтын үеэр Ерөнхий сайд энэ оны улсын төсвийг тодотгох шаардлага тулгарсан гээд ямар зардлуудыг хэмнэх болсноо танилцуулсан билээ.
Тэрээр хот дотор дарга нар том оврын машин хэрэглэхгүй, зочин хүлээн авах зардал гаргахгүй, хурал зөвлөгөөнийг цахимаар хийнэ. Томилолтоор явахдаа бизнес ангиллаар нисэхгүй. Бизнес ангиллаар нисэх бол энгийн ангиллын тийзний зөрүүг тухайн албан хаагч өөрөө нэмж төлнө гэв.
Дараа нь хувийн хэвшлийн төлөөллүүд үг хэлж, асуулт асуусан юм.
Наран группийг төлөөлж оролцсон хатагтай Д.Удвал “Бид ажиллах хүчний хомстолд орж, компаниуд хүнээ булаацалдаж байна. Төрийн албан хаагчийн цалин бага байтал маш олон хүн ажиллаж байна. Хувийн хэвшлийн олгодог цалин хамаагүй өндөр болсон. 1.8 сая төгрөгийн цалинтай борлуулагч, түгээгч ажилд авах гээд чадахгүй байна. Төр данхар бүтэцтэй, бүтээмж багатай. Төрийн албан хаагчдыг цомхтговол тэр хүмүүс хувийн хэвшилд ажиллах боломжтой. Ялангуяа барилгын салбарт ажилчид олдохгүй байна. Барилгын ажил гүйцэтгүүлэх зардал гурав дахин өссөн тул зарим төслөө хойшлуулахад хүрсэн” гэсэн юм.
Харин олон нийтийн сүлжээнд энэ хатагтайн компани хэзээ ч ийм өндөр цалин өгдөггүй, харин ч ажилласан биш өрөнд ороод гардаг тухай нэжгээд сэтгэгдлүүд хөвөрсөн юм. Нээрэн ч 1.8 сая төгрөгийн цалинтай борлуулагчаар ажилд авъя гэвэл гэвэл татгалзах хүн цөөн биз ээ.
Энд хүн мөн одоо дуулиан шуугианы эзэн болоод буй “Түмэн ойл инвест” компанийн төлөөлөл: “Шинэ сэргэлтийн бодлого”-ын хүрээнд уул уурхайн тусгай зөвшөөрөлтэй компаниуд Алтан гэрэгэ хүлээж аваарай гэж Засгийн газраас зарласан. Мөн эдгээр компаниудыг нэмүү өртөг шингэсэн бүтээгдэх үйлдвэрлэж экспортод гаргаач гэсэн. Манай компани Дорноговь аймгийн Мандах суманд уул уурхайн чиглэлээр үйл ажиллагаа явуулах гэж байгаа. Гэтэл манай компанийн үйл ажиллагаатай холбоотой сөрөг мэдээлэл сошиалд цацагдаж эхэлсэн. Та бүхэн мэдэж байгаа байх.
Багийн 50-60 иргэн уул уурхайн үйл ажиллагааг эсэргүүцсэн. Бид төсөл хөтөлбөр, орон нутагт хийгдэх ажлуудаа ил тод танилцуулж байна.
Засгийн газрын хэрэгжүүлж буй “Шинэ сэргэлтийн бодлого”, Алтан гэрэгэ төрийн хамгийн бага нэгжид хэрэгжихгүй байна. Багийн хэдхэн иргэний жижиг ашиг сонирхлын улмаас Засгийн газраас хэрэгжүүлж байгаа бодлого унаж байгааг шийдэж өгөөч. Энэ асуудал ганц манайд биш, өөр компаниудад ч тохиолдсоор байна” гэв.
Discussion about this post