Сэлэнгэ аймагт 74 настай эмэгтэй хоёр удаагийн шинжилгээний хариу эерэг гарсан. Түүнд 11-р сарын 6-нд зовиур илэрсэн (38 хэм халуурсан), 9-нд эмнэлэгт хандан PCR шинжилгээ хийхэд халдвартай болох нь тогтоогдсон юм.
Тэгвэл тус иргэний нэгдүгээр хавьтагчид буюу хамт амьдардаг бэр болон ач хүүхдийнх нь шинжилгээний хариу эерэг гарчээ. Бэр нь 35 настай бөгөөд 11-р сарын 8-ны өдөр Сэлэнгийн Сүхбаатар сумаас Дархан-Уул аймаг руу 8 настай хүүхдийнхээ хамтаар хоёр өдөр амны хаалтгүй зорчсон, дэлгүүрүүдээр явсан, хүүхдээ тоглоомын газар тоглуулсан гэж хэлжээ. Тус тоглоомын талбайгаар үйлчлүүлсэн 67 хүүхдүүд байгаа. Тэдний эцэг эхчүүдтэй нь холбогдон, тандалт судалгааг эхлүүлжээ. Мөн дам хавьтагчдыг илрүүлж тогтоохоор албаныхан ажиллаж байгаа аж. 74 настай эмэгтэй гэрээс гардаггүй бол, бэр нь Сэлэнгэ аймгийн Төмөр замын цэцэрлэгт ажилладаг болохыг тогтоожээ.
Иргэн амны хаалттай явсан гэсэн ч хяналтын камерт амны хаалтгүй явж байгаа дүр зургууд байгаа аж. Одоогоор гэрт нь тусгаарласан байгаа, удахгүй ХӨСҮТ рүү шилжүүлнэ гэж Дархан-Уул аймгийн Засаг дарга Б.Азжаргал хэллээ.
Халдвартай иргэн тус аймагт зорчсон учир Дархан-Уул аймагт хөл хорионы хатуу дэглэм тогтоон, аймаг руу орох, гарах хөдөлгөөнийг түр хаагаад байна. Аймгийн Засаг дарга Б.Азжаргал “Аймгийн хэмжээнд хөл хөдөлгөөн 80 хувь буурсан, цаашдаа 95 хувь болгон бууруулж, дэглэмийг улам чангатгана” гэлээ.
Discussion about this post