Экс гишүүн Л.Эрдэнэчимэгийн 300 сая төгрөгөөр тоглосон туслах нь 3 жилийн ял авлаа

“Монос”-ын Л.Эрдэнэчимэгийн туслах долларынх картыг ашиглан 100 гаруй мянган доллароор мөрийтэй тоглоод алджээ. Энэ нь монгол мөнгөөр бараг 300 сая төгрөг гэнэ. Г.Л нь 2017 оны эхээр “Монос фарм трейд” компанийн гүйцэтгэх захирал Л.Эрдэнэчимэгийн туслахаар ажилд оржээ.  Хавар захирал нь нисэх онгоцны тийз, зочид буудал захиалуулахаар өөрийн Худалдаа хөгжлийн банкны картын зургийг файл хэлбэрээр өгч мөн нууц дугаарыг нь хэлж өгсөн байна. Ийнхүү туслах нь дөрвөн жил орчим захирлынхаа төлбөр тооцоог олон улсын картаар нь хийж иржээ. Энэ оны хавар захирал хатагтай өнөөх картаараа төлбөр хийх гэтэл “Үлдэгдэл хүрэлцэхгүй байна” хэмээн гарч мэл гайхуулж цэл хөхрүүлжээ. Тэр дор нь санхүүгийн албаараа дамжуулж Худалдаа хөгжлийн банкнаас сүүлийн дөрвөн жилийн хуулгаа авч шалгахад сар бүр 12 мянган доллар гадаад компанийн данс руу шилжсэн байжээ. Шилжсэн дансыг шалгуулахад казино тоглуулдаг компанийх байж таарчээ. Захирал хатагтай эхлээд эзнийг олж чадаагүй гэнэ. Уурандаа “цагдаад гомдол гаргана, та нараас мэдүүлэг авна” гэж ажлыхныгаа айлгасан гэнэ. Гэтэл маргааш туслах нь ирж ”Би таны картын мөнгөөр мөрийтэй тоглоод алдсан, уучлаарай” хэмээн үнэнээ хүлээсэн байна.  Туслах нь 2017 оны зун Ононхүү гэдэг найзыгаа РС тоглоомын газар “Poker Star” гэдгийг онлайнаар тоглож байхыг сонирхож эхэлжээ. Эхлээд өөрт байсан 400 доллар буюу 1,2 сая төгрөгөөрөө тоглоод алджээ. Алдсан ч тоглоомд автаж ахин тоглосон. Явцын дунд банкны карт холбож тоглож болдгийг мэдээд захирлынхаа картыг ашиглаж үргэлжлүүлэн тоглож гарчээ. Гэсэн ч алдсаар байсан аж. Улмаар алдсан мөнгөө олж авахын тулд ахин дахин тоглосоор ийнхүү 100 гаран мянган доллар буюу 300 орчим сая төгрөгийн хохирлыг Л.Эрдэнэчимэгт учруулжээ. Экс гишүүн хатагтай дөрвөн жилийн турш картаас мөнгө гадагшаа гарч байхад мэдээгүй явсан нь гайхалтай. Экс туслах захиралдаа ердөө дөрвөн сая төгрөг л нөхөн төлсөн агаад гурван жилийн ял авсан гэнэ.