Р.Эмүжин: Урт хадаг намируулсан уянгын халилд автаж уйлав даа…

Уянгын халил эхэлсэн шүү дээ, урдаас хойноос урт зам туулан шатахуун ирж байна гээд л зураг хөвөрнө, бичлэг задарна, нулимсаа залгиад угтаж байгаа улаан мотоциклтой эр гэнэт үсрээд гараад ирж ч магадгүй. Нөгөө шатахуун импортлогчдоос 100 тэрбумыг өөрийнхөө байгуулсан “Эрчис ойл” гээч тусгай зөвшөөрөл бүхий ганц компанид төвлөрүүлэхийг шаардан дарамталж байсан Сумъяа чинь “Роснефть” рүү захиа бичсэн л болсон, бүр эх нь нийтлэгдэж, энүүхэндээ онигоо цаашаа одонцор болсон шүү дээ. Оюун-Эрдэнэ нь одоохон бензин олж ир гээд мордуулсан хүмүүсээ уулзалтанд дуудаад улалзуулж л байсан. Тэгснээ Газрын тосны хэрэг эрхлэх газрын Ц.Эрдэнэбаяр нь ” Роснефть” шатахуун нийлүүлээгүй тул манайд нөхөн төлбөр төлөх ёстой гээд далийгаад алга болсон, далий ягаан цэцэг дотор амьдардаг байх аа, энэ хэд маань. Өнөө оросууд нь аль тавдугаар сард албан бичиг илгээхэд амны усаар танай машинууд асдаг юм шиг алга болоо биз дээ гээд ам таглахаа мэднэ шүү дээ. Хоёр хөрштэйгээ хоншоортойхон харилцчих хүн үндсэндээ энэ төрд үндэс тасарч байна даа. Өө тэгж байтал удаан тасарсан шатахуунаа тосоод урт хадагтай бүсгүй алхуулж ч магадгүй хүмүүс шүү. Сав барьсан сарвайсан хэдэн хүүхдээр тосуулж гүйлгээд баллах вий дээ. Өмнөөс нь нүүр улайж, нүгэл хүртэл нуугдах юм, базарваань гэж. Шатахуун импортлогчдын төлөөлөл, улстөрчидтэйгээ 11-үүлээ Орос руу мордоод, овоо уулзалт хийгээд ирсэн. Мордсон хэдийг Ардын хувьсгалын анхны долоо шиг мандуулах юм уу, яах юм? Гайхуулаад байх ч юм биш дээ, нэг болохоор ганц ч албан захиа, ганц ч төлөөлөгчгүй алга болно, бүхэл бүтэн улс байтлаа бүүр таг. Нөгөө болохоор 11-үүлээ аргаа барсан царайгаа ар шилэн дээрээ гаргачихаад ангайгаад гүйгээд очно. Дипломат харилцаа, бизнесийн ёс зүй, улс хоорондын уламжлан авч явах учиртай урт нөхөрлөл хаана байна аааа? Шатахуунаар 10-аад хоног нам суулгаж, навсайтал хэдэн цагаар дараалалд хатаачихаад, оруулаад ирлээ гээд магтаал хүлээгээд, уянгын халил үйлдвэрлээд суугаад байж болохгүй ээ. Оюун-Эрдэнэ хэвлэлийнхнийг байлцуулан шатахуун импортлогчидтой бөөн сүр, бөөсөнд хутга болж поп уулзалт хийчихээд, сэтгүүлчдийг гарангуут энэ төрлийн бизнес эрхлэгчдэд юу гэж хэлсэн гээч? ” Ганц ч төгрөг нэмэхгүй, ганц ч төгрөгийн ашиггүй борлуураарай та нар, үнэ нэмбэл тусгай зөвшөөрлийг чинь хураана шүү” гэж заналхийлсэн байдаг юм. Энэ удаадаа тэгээд борлуулдаг байж, төрийн гаргасан алдааг хувийн хэвшлийнхэн үүрээд гардаг байж. Дараагийн удаа тэгэх үү? Үгүй. Тиймээс дахиад шатахуун тасалдахад гайхах явдалгүй. Төр удирдана, хүн ажиллуулна, менежмэнт хийнэ гэдэг чинь удирдахуйн шинжлэх ухаан юм л даа, дардаг дарамталдаг далдгарын даравгарынхаа зоргоор хийдэг ажил биш ээ. За тэгээд уянгын халил долоо хоногийн турш хөвөрнө, панаалдуулав даа! Уяатай нохой шиг шатахуунд дугаарласан нь үнэн, энэ янзаараа үе үе дугаарлах нь ч бас үнэн шүү.