VIII Богд Жавзандамба хутагтын зарлигаар бүтээгдсэн Зэс барын “Жадамба” (Жадонба – brgyad ston pa) буюу “найман мянгат” хэмээх их хөлгөн судрыг дахин сэргээн Монгол Улсад хамгийн том хэмжээтэйгээр хэвлэн Монголын Бурхан шашны бүх сүм хийд, томоохон номын сангууд, музейдэд шүтээн болгон залах ёслолын ажиллагаа, Монгол, Түвэд, Хятадад хэвлэгдсэн “Жадамба” судруудыг дэлгэн үзүүлэх үзэсгэлэн болж байна.
Хоосон чанарын утгыг найман мянган шүлгээр магтсан зохиолыг “МОНГОЛЧУУДЫН ТӨВӨД ХЭЛТ БҮТЭЭЛИЙГ СУДЛАХ МОНГОЛ БИЛИГ” судалгааны ажлын хүрээнд Бурхан багшийн зарлигийн цомирлог Ганжууртай холбоотой монголчуудын хийж бүтээсэн зүйлээс ном бүтээлтэй холбоотой зүйлийг нэгтгэн гаргаж буй “Монголчуудын Ганжууртай холбоотой ном бүтээлийн өв” хэмээх цувралаар Монголын Үндэсний эрх чөлөөний хувьсгалын удирдагч, Монгол улсын хаан, VIII Богд Жавзандамба хутагт Агваанлувсанчойжинямаданзинванчүгийн зарлигаар бүтээсэн Зэс барын “Жадамба” буюу “Хутагт билгийн чинад хязгаар хүрсэн найман мянгат нэрт” хэмээх Их хөлгөн судрын төвөд эхийг анх хэвлэсэн тэр хэмжээгээр нь дахин хэвлэж гаргаж байна.
Цагаагчин гахай жилийн өвлийн дунд сарын шинийн есөн буюу 1911 оны 12 дугаар сарын 29-нд VIII Богд Жавзандамба хутагт Агваанлувсанчойжинямаданзинванчүгийг шашин төрийг хослон баригч, хэмжээгүй эрхт эзэн хаанд өргөмжилж, энэ өдрөөс “Олноо өргөгдсөн” хэмээх шинэ он тоололтой болсон. Монгол улс тусгаар тогтнолоо зарлан тунхагласан, Монгол төрийн мэлмий нээгдсэн, “Олноо өргөгдсөн” Монгол улсын анхдугаар (1911) оны үед бүтээж эхэлсэн Мигжэд Жанрайсаг хэмээх Монгол түмний их шүтээнийг сүмийн хамт бүтээхдээ 10000 Аюуш бурхан, 1000 ширхэг “Зэс барын Жадамба” судар, Бурхан багшийн найман суварга тэргүүтэнг бүтээсэн гэдэг.
Үзэсгэлэнг зохион байгуулагчид:
Санаачлагч: Польш улсын Варшавын их сургуулийн Дорно дахины судлалын тэнхимийн багш, ламтан Рагчаагийн Бямбаа
Хамтран зохион байгуулагч: Богд хааны ордон музей
/Богд хааны ордон музейн үзэсгэлэнгийн танхим/ 
Discussion about this post