Австрали улсын Ерөнхий сайд Скотт Моррисон уугуул иргэдээсээ уучлал гуйж, мөнгө амлав. Яагаад гэвэл, 1970-аад онд тус орны эрх баригчид нутгийн уугуул иргэдийнхээ хүүхдүүдийг хүчээр салган, цагаан арьстан гэр бүлд үрчлүүлэх нэрийдлээр амьдын хагацал үзүүлж байсан юм. Тэд ийм байдлаар Австрали тивийн уугуул иргэдийг уусган шингээх бодлогыг хэрэгжүүлж байжээ.
“Энэ бол манай үндэсний түүхэн дэх хамгийн шившигтэй үе. Зовлон шаналал учруулсан түүх маань зүгээр нэг өнгөрсөн үеийн түүх биш, энэ бол үеэс үед дамжин яригдах дурсамж. Харин одоо Засгийн газар мөнгөн тэтгэмж олгосноор шившигт үйлдлээ цайруулах алхам хийж байна” хэмээн Австралийн Ерөнхий сайд Скотт Моррисон мэдэгдлээ. “Засгийн газар уугуул иргэдээсээ уучлал гуйж, буруугаа хүлээхийн зэрэгцээ дээрх зовлонг биеэр туулж өнгөрсөн бүх хүнд нэг удаагийн нөхөн олговор болгон 75 мянган австрали доллар өгөхөөр шийдсэн. Дээр нь нэмж 7 мянган долларыг эмчилгээнд зориулан олгох юм. Нөхөн олговор өгөх нийт 350 сая австрали долларыг улсын төсвөөс гаргана” гэж “France Info” мэдээлжээ.
“Мэдээж мөнгө хэнд ч гэр бүлийг нь орлохгүй. Гэхдээ энэ мөнгө сэтгэл санааны шархыг ямар нэг байдлаар эдгээхэд тусална гэж бид найдаж байгаа” хэмээн Уугуул иргэдийн үндэсний нийгэмлэгийн гүйцэтгэх захирал Пэт Тернер мэдэгдлээ. 
Discussion about this post