АНУ-ын 44 дэх Ерөнхийлөгч Барак Обама 60 насны төрсөн өдрөө Мартас-Винъярд арал дээрх өөрийн эдлэнд тансаг тэмдэглэхээр зэхэж байна. 12 сая долларын ийм шилтгээнийг Обама Цагаан ордонд суухаас өмнө ч, 8 жил Ерөнхийлөгч байхдаа ч авч дийлээгүй. Яагаад гэвэл, тэр Америк гүрний Ерөнхийлөгчөөр ажиллах хугацаандаа өмнө тавьсан өр зээлээ дарж байжээ. Обама өөрийн багахан хадгаламжаа сонгуульд зарцуулсан бөгөөд төрийн тэргүүний цалингаар гэр бүлийнхээ зээлийг бүрэн төлж дууссан юм, түүний дотор эхнэрийнхээ, өөрийнхөө их сургуулийн төлбөрийг ч гэсэн…
Ерөнхийлөгчийн албан тушаалаа өгсний дараа Обама гэргийнхээ хамт “Netflix” компанитай кино, цуврал киног продюсорлох гэрээ байгуулж, баяжиж хөрөнгөжих эхлэлээ тавьжээ. Тэдний анхны кино “American Factory” нь шилдэг баримтат киногоор шалгарч “Оскар” хүртсэн билээ. Мөн Мишелийн бичсэн ном, Обамагийн дурсамж олон сая хувиар хэвлэгдэж зарагдсан тухай “Penguin Random House” хэвлэлийн газар мэдээлсэн. Энэ 2 номын зөвхөн “аваанс” нь 65 сая доллар. Барак Обама, Мишель Обама хоёр бас номынхоо сэдэвтэй холбоотой аяга таваг, лаа, бэлэг дурсгалын зүйлийг ч зардаг. Лааны набор гэхэд 35 доллар гэх мэт. Номоос олдог нийт орлогоо Обамагийн гэр бүл ихэд нууцалж байгаа. Үүн дээр Обамагийн илтгэлийн орлогыг нэмэх хэрэгтэй. Илтгэх урлагт суралцсан экс ерөнхийлөгч олны өмнө нэг гараад л Ерөнхийлөгчийн бүтэн жилийн цалинтай дүйцэхүйц мөнгө олдог. Нарийн тодруулбал 400 мянган доллар гэсэн үг. Одоогоор Обамагийн хөрөнгө 135 сая доллар хүрчээ. Гэтэл тэр анх Ерөнхийлөгч болох үед гэр бүлийн хөрөнгө нь 1 сая доллар жаахан давж байсан юм.
Түүний төрсөн өдрийн баярт хөтлөгч Опра Уинфри, режиссер Стивен Спилберг, жүжигчин Жорж Клуни зэрэг олон алдартан хүрэлцэн ирнэ. Гэхдээ Обама төрсөн өдрийн бэлгийн оронд буяны байгууллагад хандив өргөсөн баталгаа авчрахыг урилга өгөхдөө хүсчээ. Тэгэхдээ урилгатай зочид зөвхөн арьс өнгөөр гадуурхах үзлийн эсрэг, жендерийн тэгш эрхийн төлөө тэмцдэг байгууллагад мөнгө хандивлах ёстой юм байна. Эргэн сануулахад, Барак Обама 2009 онд Америкийн түүхэн дэх хамгийн залуу Ерөнхийлөгч, бас анхны хар арьст төрийн тэргүүн болсон билээ.
Discussion about this post