УДЭТ-ын жүжигчин Н.Баярмаа “Анна Каренина” жүжгийн гол дүрд тоглож олны анхааралд орсон. Хүүхдийн баяраар Алдарт эхийн 2 дугаар одон авсан дөрвөн хүүхдийн ээж Н.Баярмаа үзэгчдийн хайрыг бүр их татлаа. Жүжигчин Н.Баярмаа СУИС-ийн жүжигчний ангийг төгссөн. С.Бямбаагийн “Алсын удирдлага” киноны гол дүрд тоглож, тэр кино Пусаны кино наадамд түрүүлж, 30 мянган доллароор шагнуулсан. Н.Баярмаа “Сүүлчийн шөнө”, “Хайр эргэсэн хавар” кинонд айл гэр бүл үймүүлж, нөхрийг нь салгаж байгаа, “Бүсгүйчүүд хайрыг хүснэ” цувралд ганц бие бүсгүйн дүрд тоглосноос үүдэн нөхөргүй гэж үзэгчид бодсон бололтой. Мөн жүжигчин Н.Баярмаа Playboy сэтгүүлийн 2014 оны 11 дүгээр сарын дугаарын нүүрийг чимж байсан удаатай.
Жүжигчин Н.Баярмаа 1987 онд гуравдугаар сарын 20-нд Дундговь аймагт төрсөн. 2004-2008 онд СУИС-ийг С.Сугарын удирдлагад жүжигчний мэргэжлээр төгссөн юм. 2008-2011 онд SBN телевизэд орчуулгын киноны дуу оруулагчаар ажиллаж, 2012 онд УДЭТ-ын дэргэдэх театр студид элсэн, 2014 оноос УДЭТ-ийн жүжигчнээр ажиллаж байна. Н.Баярмаа “Нора” жүжгийн Нора, “Жаргаагүй нар” жүжгийн их зохиолч Д.Нацагдоржийн гэргий Пагмадуламын дүрийг бүтээсэн. “Би эндээс явахгүй” жүжгийн Дулмаа, 2020 онд “Анна Каренина” жүжгийн Анна Каренинагийн дүрийг тус тус бүтээсэн нь нэр алдар авчирсан билээ.
Юутай ч жүжигчин Н.Баярмаа нөхөртэйгээ хамт олны өмнө гардаггүй. Өмнө нь 9 сарын 1-нд ч хүүхдүүдээ ганцаараа сургуульд хүргэж өгдөг байлаа. Дөрвөн хүүхэдтэй эмэгтэй УДЭТ-т ажиллаж, хажуугаар нь олон ангит кинонд тоглон амжилттай яваа нь ар гэр, ээжийнх нь ач гэдгээ ярьдаг. 
Discussion about this post