Оросын холбооны улс өнөөдрөөс эхлэн 6-18 хүртэлх насны бүх сурагчдад 10 мянган рублийн нэг удаагийн тэтгэмж олгож эхэлжээ. Ерөнхийлөгчийн гэж нэрлэгдсэн энэ мөнгийг Орос орны 20 сая орчим хүүхэд авна. ОХУ-ын Ерөнхийлөгч Владимир Путин анх энэ саналыг бүр 2021 оны 4 сард Холбооны хуралд илгээмж хүргэхдээ гаргаж, өнгөрсөн 7 дугаар сард тушаалд гарын үсэг зуржээ. Уг нь мөнгийг 8 сарын дундуур тараахаар төлөвлөсөн байсан аж. Харин Ерөнхийлөгч Путин “Эцэг эхчүүд хичээлийн жилийн бэлтгэлийг яаралгүй хангахад хэрэгтэй тул өгөх хугацааг наашлуулъя” гээд 2021 оны 8 сарын 2-ноос олгохоор болсон аж.
Орос холбооны улсын Хөдөлмөрийн сайд Антон Котяков “Бүх бэлтгэл ажил дууссан. 8 сарын 2-ны өдөр сургуулийн насны бүх хүүхдийн эцэг эхийн данс руу шилжихэд бэлэн. Эцэг эхчүүд энэ мөнгийг авахаар Тэтгэврийн санд биечлэн хандах буюу төрийн үйлчилгээний сайтаар дамжуулан онлайнаар өргөдөл бөглөхөд хангалттай” хэмээн мэдэгджээ.
Discussion about this post