Цахим шилжилтийг хийж хэрэгжүүлэх “Цахим хөгжлийн багц хуулиуд” болох “Нийтийн мэдээллийн тухай хуулийн төсөл”, “Кибер аюулгүй байдлын тухай хуулийн төсөл”, “Хүний хувийн мэдээллийг хамгаалах тухай хуулийн төсөл”, “Цахим гарын үсгийн тухай хуулийн төсөл”-үүдийг Улсын Их Хурлаар хэлэлцүүлэхэд бэлтгэх үүрэг бүхий Инновац, цахим бодлогын байнгын хороо, Хууль зүйн байнгын хорооны хамтарсан ажлын хэсгийг Улсын Их Хурлын дарга Г.Занданшатар 2021 оны 07 дугаар сарын 06-ний өдрийн 54 тоот захирамжаараа байгуулж, уг ажлын хэсгийг УИХ-ын гишүүн Н.Учрал ахлан ажиллаж байна.
Өнөөдөр тус ажлын хэсгийн гишүүд болох УИХ-ын гишүүн Д.Цогтбаатар, Ж.Сүхбаатар, Б.Саранчимэг, Т.Доржханд, П.Анужин, Э.Бат-Амгалан нар болон Инновац, цахим бодлогын байнгын хороо, Хууль зүйн байнгын хорооны холбогдох албан тушаалтнууд Тагнуулын Ерөнхий газрын Мэдээллийн аюулгүй байдлын газар, Үндэсний Дата төв УТҮГ-т ажиллалаа.
Уг уулзалтаар Монгол улсын мэдээллийн аюулгүй байдал, төрийн болон нийтийн мэдээллийн хадгалалт, хамгаалалт, тэдгээр мэдээллийг ашиглаж буй нөхцөл байдалтай газар дээр нь танилцан, цаашид анхаарах, хийж хэрэгжүүлэх ажлууд, нэн ялангуяа Цахим хөгжлийн багц хуулийг батлах явцад онцгойлон анхаарах шаардлагатай байгаа асуудлуудыг ярилцлаа.
Энэ үеэр тус ажлын хэсгийн ахлагч Н.Учрал “Монгол Улсын хувьд Кибер аюулгүй байдлын индексээр өнгөрөгч 2020 онд 196 орноос 120 дугаар байрт бичигдсэн байна. Кибер аюулгүй байдал, түүний эрх зүйн болоод техникийн хамгаалалт сул байна гэдэг бидний хувьд маш том хаалт юм. Тиймээс хуулийн төслийн хүрээнд болон Инновац, цахим бодлогын байнгын хорооны үйл ажиллагааны хүрээнд Мэдээллийн аюулгүй байдлын чиглэлээр онцгойлон анхаарч Тагнуулын байгууллага, холбогдох мэргэжлийн байгууллагуудын санал зөвлөмжид үндэслэн, үйл ажиллагаагаа шаргуу хэрэгжүүлэх болно” гэлээ. 
Discussion about this post