Солонгос улсад ажил хөдөлмөр эрхэлж байгаад үйлдвэрийн осолд өртсөн Монгол иргэдэд БНСУ-ын Хөдөлмөр халамжийн корпорациас өнгөрсөн 2020 оны байдлаар нийт 214 иргэнд 3 тэрбум 484 сая воны нөхөн олговор олгосон статистик мэдээ байна. БНСУ дахь Хөдөлмөр, нийгмийн хамгааллын үйлчилгээний төв тус байгууллагатай 2021-2023 онд хамтран хэрэгжүүлэх үйл ажиллагааны талаар хэлэлцэн зөвшилцөөд байгаа билээ. Хөдөлмөр халамжийн корпорацтай болон “AWCA” холбоотой хамтран хэрэгжүүлэх халамж үйлчилгээний чиглэлд гадаад ажилчдад олгох нөхөн олговрын дүнг нэмэгдүүлэх, ажил олгогчоос олгогдоогүй цалинг шийдвэрлэх, ажилгүйдлийн даатгалд өргөнөөр хамруулж нөхөн олговор олгуулах хүрээг нэмэгдүүлэх, үйлдвэрийн ослын нөхөн олговрын талаарх бодлого төлөвлөлтийг илүү сайжруулж шинэчлэх зэрэг олон талт ажлуудыг хамтран хэрэгжүүлэхээр шийдвэрлэсэн нь монгол иргэдэд хэрэгцээтэй, чухал ач холбогдолтой юм.
БНСУ-ын Хөдөлмөр халамжийн корпорациас энэ сарын 18-нд зохион байгуулсан Азийн хөдөлмөр эрхлэгчдийн эрх ашгийг хамгаалах, үйлдвэрийн ослын даатгалын холбооны 5 дахь удаагийн ээлжит бүгд хуралд ХНХҮТ-ийн дарга Д.Баярмандах урилгаар оролцож дээрх асуудлаар санал солилцсон билээ.
Discussion about this post