“ШУРАНХАЙ” ХАМТЛАГИЙН ДУУЧИН Д.ҮҮРИЙНТУЯА НӨХРӨӨ ЭХЭЛЖ “ЭРГҮҮЛЖЭЭ”

Ардын дуу, уртын дууг эргээд “мода”-нд оруулсан дуучид бол яах аргагүй “Шуранхай” хамтлагийн охид. Архангай аймгийн охин Г.Эрдэнэчимэг, Баянхонгор аймгийн охин Б.Номин-Эрдэнэ, Дундговь нутгийн Үүрийнтуяа гэсэн гурван охин нийлж, “Шуранхай” хамтлаг байгуулсан нь ёстой л нүдээ олсон алхам болсон. СУИС-ийн уртын дууны багш, МУГЖ Дэлгэр багшийн шавь гурван уртын дууч охиныг монголчуудаас илүү гадаадынхан сонирхож гадаадын олон орноор уригдаж тоглолтоо хийсэн овжин охид. Монголдоо анхны тоглолтоо улсын циркт хийхэд одоогийн ССАЖ-ын сайд Ц.Оюунгэрэл нөхөр Жеффийн хамт ирж үзсэн. Тоглолт ч үнэхээр сайхан болсныг үзсэн хүмүүс одоо ч ярьдаг. Ид мандаж явсан охидын хамтлагийг тараасан гол “буруутан” нь МУГЖ Самандын Жавхлан. Тэрээр хамтлагийн дуучин Гантөгсийн Эрдэнэчимэгийг гэргий болгож аваад, Г.Эрдэнэчимэг хоёр хүүхдийн ээж болж уран бүтээлээсээ түр хөндийрсөн. Өнгөрсөн хавар “Хамаг Монгол” төсөлд оролцож, монгол туургатны зургаан дуучин эр хамтарсан тоглолтыг Г.Эрдэнэчимэг уртын дуугаараа нээж, хүмүүс “Г.Эрдэнэчимэг эргээд уран бүтээлдээ оржээ” гэлцсэн. Харин Г.Эрдэнэчимэг гурав дахь хүүхдээ төрүүлэхээр зэхэж, С.Жавхлан гавьяат, Г.Эрдэнэчимэг хоёр гурав дахь хүүхдээ өнөө маргаашгүй өлгийдөн авч магадгүй байгаа.“Шуранхай” хамтлагийн дуучин Үүрийнтуяа өнгөрөгч оны 11 дүгээр сарын 14-нд, УИХ-ын 22 гишүүн чуулганы хуралдаанаар Чингис хааны төрсөн өдөр гэж тогтоосон өдөр хуримаа хийсэн. Үүрийнтуяагийн нөхөр нь уртын дуучин Жавхаасайхан. “Эр бор харцага” дууг дуулах шиг болдог Жавхаасайхан  нэр хүндтэй дуучин. Тэр хоёр СУИС-д хамт суралцаж байсан гэдэг. СУИС-ийн оюутан Үүрийнтуяа, дээд курст нь сурдаг ах Жавхаасайханыг дуулж, бэлтгэлээ хийж байхыг хардаг байж. Харин нэг удаа дуулж байхыг нь харж суугаад Жавхаасайханыг үнсчихээд гүйгээд явчихсан гэдэг. Ийм байдалд орсон эр хүн ямар нэг юм бодно биз дээ. Удаа ч үгүй Жавхаасайхан Солонгост жил гаруй дуулахаар явж, Үүрийнтуяа руу утсаар ярьсаар байгаад дотноссон аж. Одоо тэд 5-6 жил хамтдаа амьдарч, хоёр хүүхдийн аав, ээж болсон. Жавхаасайхан, Үүрийнтуяа хоёрын энэ хөгжилтэй дурсамжийг сонссон хүмүүс “Үүрээ ёстой зөв алхам хийсэн” гэж дүгнэдэг. Хэрэв Үүрийнтуяа түрүүлж алхам хийгээгүй бол, үг дуу цөөнтэй Жавхаасайхан хэдэн жил ч Үүрээд сэтгэлээ нээхгүй явах байсан юм билээ. Юутай ч дуу хуурын өлгий Дундговь нутгаас төрөн гарсан уртын дуучин Үүрийнтуяаг үнэхээр сайн уртын дуучин гэж урлагийнхан үнэлдэг. WWW.TAIZ.MN