Дэлхийн 50 хүн тутмын 1 нь халдвар авчээ

Дэлхий даяар коронавирүсийн халдвар авсан хүний тоо 155,9 сая хүрчээ. Энэ нь дэлхийн хүн амын 2 хувиас илүү гэсэн үг. Өнгөрсөн 2020 оны 7 сарын мэдээгээр манай гараг дээр 7 тэрбум 795 сая хүн амьдарч байв. Тиймээс дэлхийн 50 хүн тутмын 1 нь халдвар туслаа. Коронавирүсийн халдвартай хүмүүсийн бараг тал нь 5-хан оронд ногдож байна. Үүнд: Америк 32,7 сая, Энэтхэг 21,5 сая, Бразил 15 сая, Франц 5,8 сая, Турк 5 сая. Цөөн хүнтэй хэрнээ халдвар өндөр тархсан орнууд бол Андорра, энд хүн амын 17 хувь буюу 13,4 мянган хүн ковидоор өвчилжээ. Мөн Черногорын хүн амын 15,7 хувь нь буюу 98 мянган хүн халдвартай байна.
Дэлхийн олон оронд Цар тахлын 3-р давалгаа явагдаж байгаа бол зарим улс бүр 4 дэх давалгаа эхэллээ гэж мэдэгдлээ. Мөн 4 сарын 29-нд хоногт хамгийн олон хүн халдвар авсан, 24 цагт 904,7 мянга. Одоо дэлхий дээр 19 сая хүн ковидоо эмчлүүлж байна. Нас барсан хүний нийт тоо 3,2 саяд хүрсэн нь халдвар авсан хүмүүсийн 2,1% гэсэн үг. Хамгийн их үхэл Америкт бүртгэгдсэн, 583 мянган хүн. Дараа нь Бразил 415 мянга, Энэтхэгт 230 мянган хүн коронавирүсээс болж нас баржээ. Хувиар тооцож үзвэл хамгийн их нас баралттай орнуудын тоонд Йемен 19,6, Мексик 9,3 хувиар бичигджээ.

Дэлхийн эрүүл мэндийн байгууллагын мэдээлснээр 5 сарын 4-ний байдлаар “COVID-19” вакцин тариулсан хүний тоо 1’170’942’729 болсон. 5 сарын 6-ны мэдээгээр 3’236’104 хүн нас барсан аж. Гэтэл энэ тоонд америк эрдэмтэд эргэлзэж өөрийн судалгааг нийтэлжээ. “Коронавирүсээр нас барсан хүмүүсийн бодит тоо үнэн хэрэгтээ хавьгүй өндөр гарна, ДЭМБ-ын албан мэдээгээс 2 дахин их буюу 6,9 сая орчим” гэж Америкийн Эрүүл мэндийн байдал, үзүүлэлтийг хэмжих хүрээлэнгийн эрдэмтэд мэдэгдэв. Тэд 20 орны ковидоор нас барсан хүмүүсийн баримтыг судалсны эцэст энэ тоог гаргаж ирсэн гэжээ.