Хоёр улсын хилийг нэгэн иргэн дур мэдэн өөрчилсөн ер бусын хэрэг хэдхэн хоногийн өмнө гарлаа. Бельги улсын Эркёлин хотын фермер эр өөрийн талбай дээгүүр трактороор явахад саад болоод байна гээд харь орны хилийн зурвасыг дураараа өөрчилчихжээ.
Франц, Белгийн хилийн заагийг тэмдэглэж тэр чулууг бүр 1819 онд тавьсан аж. Харин фермер эр тэр чулууг зайлуулж холдуулснаар Франц улсын газар нутаг 2,2 метрээр багасаж, Бельгийнх тэр хэмжээгээр нэмэгджээ.
Энэ хэргийг хилийн багана судлаач Жан-Пьер Шопен саяхан Бузиньи-сюр-Рокийн ойд зугаалж яваад илрүүлэн учрыг олохоор судалжээ. “Хилийн багана байх ёстой газраасаа 2 метр 76 см хөдөлж хөрш улсын хил рүү нэвтэрсэн хэргийг тодруулахаар ойролцоох тосгон, хотхоны иргэдтэй уулзлаа. Францын Бузиньи-сюр-Рок тосгон багасаж хөрш орших Бельгийн Эркёлиных томорсон. 200 гаруй жилийн турш мөрдөж ирсэн Кортрейкийн гэрээг зөрчжээ” гэж тэр хэвлэлийнхэнд ярилцлага өгчээ. Уншсан хүмүүс “Тосгоны тэнэгүүд хийсэн биз”, “Фермерч өөрийн талбайгаа томсгох гэсний үр дүн” гэж орон нутгийн иргэд тайлбарлаж байсан нь батлагдлаа.
Азаар Франц, Бельги улсууд дипломат дуулиан дэгдсэнгүй, эв найртай асуудлаа зохицуулсан юм. “Хоёр орны орон нутгийн эрх баригчид элдэв шуугиан дэгдээсэнгүй, харин ч үүссэн нөхцөл байдалд хошин байдлаар хандаж байна” хэмээн “TF1” мэдээллээ.
Мэдээж, Францын хотын дарга энэ зөрчлөө даруй арилгахыг холбогдох албан тушаалтнуудаас шаардсан байна. Бельгийн Эркёлин хотын дарга Давид Лаво “Энэ эр трактороор явахын тулд Бельги улсыг томсгоод Францыг багасгачихаж (инээмсэглэв). Манай хот том болсонд би баярлаж байгаа ч хөрш Бузиньи-сюр-Рокийн мэр санал нийлэхгүй байгаа” гэж сэтгүүлчдэд хошигнон ярьжээ. Харин Франц улсын Бузиньи-сюр-Рок хотын мэр Орели Велоне “Би хөрш Бельгийн хотын даргад итгэж байна, нөгөө фермерт арга хэмжээ авах байх. Бид хилийн баганыг буцааж хэвэнд нь оруулахыг шаардсан” гэж мэдэгдэв. Хэрэв фермер үгэнд орохгүй бол Гадаад харилцааны яам оролцож хилийн асуудлыг зохицуулах шаардлага үүснэ гэдгийг францчууд онцлон сануулжээ.
Discussion about this post