“Ододтой бүжиглэе” шоуны шилдэг оролцогчийн нэг бол мисс Ц.Аззаяа. Тэрээр Соёл урлагийн их сургуулийн хөгжимт театрын жүжигчний ангийг төгссөн. Дунд сургуулийн эрхлэгч нь түүнийг жүжигчний мэргэжил сонгоход нь “Хайран толгой. Чи бол жүжигчин биш захирал болох хүн” хэмээн загнаж байсан гэдэг. Ц.Аззаяа дунд сургуульд байхдаа математикийн олимпиад болгонд амжилттай оролцдог байсан нь багшийгаа ингэж халаглахад хүргэжээ.
Ц.Аззаяа “Мисс Монголиа 2015” тэмцээний тэргүүн миссийн титэмтэй. Аззаяа “Багадаа дуулахыг, бүжиглэхийг, загвар өмсөхийг мөрөөддөг байсан. Миний бодож санасан, хүсэл мөрөөдөл бүхэн биелээд байх шиг санагдаж байна. Яг л хүслээр минь болж байна” гэж ярьж байсан. Аззаяа “Андра модель” агентлагийн загвар өмсөгч. Аззаяагийн ээж нь МУГЖ Ширмэнтуяа, эмээ нь МУГЖ Л.Чаминчулуун. Ц.Аззаяа эмээтэйгээ “хуйвалдаад” ээжийгээ ятгуулж чадсанаар “Торго” агентлагт 2011 онд гэрээт загвар өмсөгчөөр орж, хоёр жил ажилласан сайхан бүсгүй. УДЭТ-т ажиллаж, “Би эндээс явахгүй” жүжигт тоглосон удаатай.
Ц.Аззаяа дунд сургуульд ороогүй байхдаа “Вансэмбэрүү” кинонд МУГЖ Н.Батцэцэгийн бага насны дүрд тогложээ. Зургаан настайдаа хөдөө хоёр сар кино зураг авалтанд гараад гэрээсээ хол явж байсан. Ээж МУГЖ дуучин Ширэнтуяа нь одоо “Яасан ч зоригтой байсан юм бэ, жаахан охиноо хөдөө хээр ганцааранг нь хүмүүст өгөөд явуулчихдаг” гэж ярьдаг аж. “Вансэмбэрүү” кинонд Ардын жүжигчин Н.Сувдаа, Цэрэндагва, Батцэцэг олон жүжигчид тоглосон билээ.
Discussion about this post