Удахгүй 102.39 каратын, “D” өнгийн буюу ямар ч өнгөгүй очир эрдэнийг “Sotheby’s”-ийн дуудлага худалдаагаар худалдах гэж байна. Хоёр жилийн өмнө олборлож байсан энэхүү эрдэнийн чулуу 12-30 сая ам.долларын үнэ хүрч магадгүй байгаа аж. “De Beers” компанийн Онтарио дахь “Victor” уурхайгаас олборлож байсан энэхүү очир эрдэнэ жижиг өндөгний хэмжээтэй, анх 271 карат байсныг жил гаруйн хугацаанд зүсэж, өнгөлөн одоогийн хэлбэрт оруулжээ. Дуудлага худалдаанд оролцогчдыг онлайнаар бүртгэж эхэлсэн байна. Хонгконгт болох дуудлага худалдааны ялагч аравдугаар сарын таванд тодрох юм байна. Энэ очир эрдэнийг зарагдтал нь Бээжин, Шанхай, Нью-Йорк, Тайбэйд зөвхөн урилгатай зочид оролцох үзэсгэлэнд үзмэр болгон тавих ажээ.
Өнөөдрийг хүртэл 100 каратаас дээш жинтэй тунгалаг долоон очир эрдэнийг дуудлага худалдаагаар худалдсан байна. Дуудлага худалдаагаар зарагдаж байсан хамгийн үнэтэй очир эрдэнэ бол “Pink Star” бөгөөд 2017 онд Хонгконгт болсон “Sotheby’s”-ийн дуудлага худалдаагаар 71.2 сая ам.долларын үнэд хүрч байжээ.
Discussion about this post