“Энхсаран” сувилалд 2020 оны аравдугаар сард тусгаарлагдсан иргэдээс халдвар илэрсэнтэй холбоотойгоор Улсын Онцгой комиссоос цагдаагийн байгууллагад шалгуулахаар хандсан. Цагдаагийн байгууллагаас уг хэрэгт холбоотойгоор албан тушаалтан 6, дэглэм зөрчсөн 5, бусдыг өдөөн турхирсан 2 буюу нийт 13 хүнд эрүүгийн хэрэг үүсгэн, яллагдагчаар татах хүсэлтийг прокурорын байгууллагад хүргүүлжээ. Энхсаран сувилал нь хотоос 25 км-ийн зайтай Сонгинохайрхан уулын өвөрт Туул голын хөвөөнд байрладаг. Анх 2000 онд уламжлалт, эмэгтэйчүүдийн чиглэлээр байгуулагджээ.
2009 оноос уламжлалт сэргээн засах, эмэгтэйчүүдийн өвчний тусламж үйлчилгээ үзүүлэх сувиллын газар болон өргөжсөөр өдийг хүртэл эмнэлэг, сувиллын үйл ажиллагаагаа тасралтгүй явуулж ирсэн байна. Мөн ахмад настанд хөнгөлөлттэй үнээр үйлчилж, жилийн дөрвөн улиралд байнгын ажилладаг. Одоогоор дорнын болон орчин үеийн анагаах ухааны эмчилгээний аргуудыг хослуулж тусламж үйлчилгээ үзүүлдэг. Өвөлдөө 70 хүн, зуны улиралд 150 хүн хүлээн авах хүчин чадалтай.Коронавирус цар тахлаас шалтгаалан өнгөрсөн хавар буюу гуравдугаар сараас гадаадаас ирсэн хүмүүсийг тусгаарлалтад авч эхэлсэн байна.
Дээрх сувилал нь Энэтхэг, Солонгос, ОХУ-аас ирсэн иргэдийг нэг дор байрлуулж, Эрүүл мэндийн яамны холбогдох журам заалтуудыг зөрчсөн байна. Мөн тусгаарлах байранд байхдаа нэгнийхээ өрөөгөөр орж гарах, амны хаалт зүүхгүй байх зэрэг дэглэм зөрчсөн таван иргэн, мөн иргэдийг өдөөн турхирч эмх замбараагүй байдал үүсгэсэн хоёр иргэнд эрүүгийн хэрэг үүсгүүлэхээр прокурорын байгууллагад ханджээ. Дашрамд дурдахад, шалгалтын явцад тухайн байранд байсан иргэд халдвар хамгааллын дэглэм сахидаггүй, амны хаалт зүүдэггүй, өрөө хооронд хэсдэг, мөн ажилчдад нь хамгаалах хэрэгсэл байдаггүй, ариутгал халдваргүйжүүлэлтийг тогтмол хийдэггүй зэрэг зөрчил илэрсэн байна.
Discussion about this post