Баянгол дүүргийн Эрүүгийн хэргийн анхан шатны шүүхэд ирэх хоёрдугаар сарын 1-ний 09.00 цагт “Монгол газар корпорейшн” ХХК-ийн захирал Ц.Мянганбаяр, Х.Даржаа нарт холбогдох гэм буруугийн шүүх хуралдааныг товлосон байна. Урьдчилсан хэлэлцүүлгийг өчигдөр хийж, яллагдагч нарыг шүүхэд шилжүүлснээр, гэм буруутай эсэхийг тогтоох шүүх хуралдааныг ийнхүү товложээ.
Нийслэлийн прокурорын газраас “Монгол газар корпорейшн” ХХК-ийн захирал Ц.Мянганбаяр, Х.Даржаа нарт холбогдуулан яллах дүгнэлт үйлдэж Баянгол дүүргийн Эрүүгийн хэргийн анхан шатны шүүх ирүүлсэн байна.
Ц.Мянганбаяр, Х.Даржаа нар нь Архангай аймгийн Цэнхэр сумын нутагт байрлах алтны орд газарт нөхөн сэргээлт хийх, алт олборлох чиглэлээр хамтран ажиллах гэрээгээр халхавчлан нэр бүхий иргэдэд их хэмжээний хохирол учруулж залилсан гэмт хэрэгт холбогджээ. Архангай аймгийн Цэнхэр суманд алт олборлох зөвшөөрөл бүхий 13 тусгай зөвшөөрөл дангаараа Ц.Мянганбаярын нэр дээр байдаг аж. Ц.Мянганбаяр эдгээр лицензийг компани хооронд дамлан наймаалж ашиг олж ирсэн. Ингэхдээ “Монгол газар корпорейшн” ХХК алтны лицензтэй талбайн нэг га газрыг 10 саяас эхлэн үнэлж, гэрээ байгуулан бусад компаниудаар алт олборлуулдаг гэж буруутгаж байна.
Discussion about this post