Монголын Шатрын холбооны ерөнхийлөгч Г.Занданшатар Сингапур улсад болсон Азийн шатрын лидерүүдийн чуулганд “Засаглал ба шатар” сэдвээр илтгэл тавьсныхаа дараахан нэгэн гэнэтийн бөгөөд сонирхолтой урилга хүлээн авлаа. Тэрээр чуулганы завсарлагаанаар дэлхийн хошой аварга багийн ахлагч, Германы бизнесмен Вадим Розенштайнтай халз тоглож, ширүүн өрсөлдөөний эцэст буулган авсан байна. Энэхүү ялалтын дараа Розенштайн түүнийг Дэлхийн багийн аварга шалгаруулах тэмцээнд өөрийн багтаа тоглохыг албан ёсоор урьжээ.
Энэхүү үйл явдал нь зүгээр ч нэг нөхөрсөг тоглолтын үр дүн биш бөгөөд Монголын шатрын салбарт том үйл явдал айсуйг илтгэж байна. Учир нь энэ сарын 29-нөөс 6-р сарын 7-ны өдрүүдэд Азийн шатрын аварга шалгаруулах тэмцээн Монгол Улсад зохион байгуулагдах гэж байна. Энэхүү тэмцээний үеэр Олон улсын шатрын холбооны (ФИДЕ) Ерөнхийлөгч Аркадий Дворкович, Казахстаны тэрбумтан Тимур Турлов болон саяхан ялагдал хүлээсэн Вадим Розенштайн тэргүүтэй дэлхийн шатрын ертөнцийн хамгийн нөлөө бүхий эрхмүүд Улаанбаатарт хүрэлцэн ирэх юм.
Г.Занданшатарт ялагдсан Вадим Розенштайн гэж чухам хэн бэ? Тэр бол зүгээр нэг шатар сонирхогч биш, харин дэлхийн ложистикийн салбарт тэргүүлэгч “WR Group”-ийн үүсгэн байгуулагч, Германы нөлөө бүхий бизнесмен юм. Хамгийн чухал нь тэрээр дэлхийн шатрын түүхэнд хамгийн хүчирхэгт тооцогдох “WR Chess” супер багийн эзэн бөгөөд ахлагч нь юм. Түүний багт шатрын домог Магнус Карлсен, Фабиано Каруана, Хоу Ифань зэрэг жинхэнэ “Авенжерс”-үүд тоглож, Дэлхийн Рапид болон Блиц багийн аварга шалгаруулах тэмцээнд хоёр ч удаа түрүүлээд байна.
Дэлхийн аварга шалгаруулах энэхүү супер багт багтах нь хэр хэцүү вэ гэдэг нь маш сонирхолтой. ФИДЕ-ийн дүрмээр Дэлхийн багийн аварга шалгаруулах тэмцээнд оролцож буй багууд заавал хэзээ ч 2000-аас дээш чансаанд хүрч байгаагүй нэг сонирхогч тоглогчийг үндсэн бүрэлдэхүүндээ оруулах хатуу шаардлагатай байдаг. Вадим Розенштайн өөрөө энэхүү сонирхогчийн ширээнд суудаг бөгөөд түүнийг буулган авна гэдэг нь Г.Занданшатар шатрын өндөр мэдрэмжтэйгээ батлан харуулж, Магнус Карлсентэй нэг баг болж дэлхийн аваргад өрсөлдөх маш ховор бөгөөд үнэ цэнтэй “тийз”-ийг гардсан гэсэн үг юм.
Энэ үйл явдлыг зөвхөн спортын өнцгөөс бус, “Шатрын дипломат ажиллагаа” (Chess Diplomacy) гэдэг илүү өргөн зургаар харах шаардлагатай. Дэлхийн хэмжээний тэрбумтнууд болон ФИДЕ-ийн удирдлагуудыг эх орондоо хүлээн авч, тэдэнтэй нэг ширээнд сууж оюуны тулаан хийх нь Монгол Улсын нэр хүндийг олон улсад өсгөхөөс гадна эдийн засаг, хөрөнгө оруулалтын цоо шинэ гүүр болох боломжтой. Казахстаны “Freedom Holding”-ийн үүсгэн байгуулагч Тимур Турлов болон Розенштайн нар нь зөвхөн шатрын ивээн тэтгэгчид төдийгүй дэлхийн санхүү, бизнесийн томоохон тоглогчид юм.
Товчхондоо, Монголын Шатрын холбооны ерөнхийлөгчийн Сингапурт хийсэн нүүдэл зөвхөн шатрын хөлөг дээрх ялалтаар хязгаарлагдсангүй, дэлхийн шилдгүүдтэй нэг баг болох үүд хаалгыг нээлээ. Удахгүй Монголд болох Азийн аварга шалгаруулах тэмцээн нь манай улсыг дэлхийн оюуны спортын нэгэн төв болгох томоохон алхам болох нь ээ.
Discussion about this post