Онцгойн удирдлага төрийн далбаа, модон жаазанд 25 сая, аврагчдын хамгаалалтын хувцаст 15 сая төгрөг зарцуулжээ

ОБЕГ-ын удирдлага Дүнжингаравд болсон шатамхий хийн дэлбэрэлтээс сургамж авахын оронд шалдир булдир гэмээр юмаар оролдож хийцгүйрч суугаа нь хотын төвд болсон клипний сүртэй зураг авалтаас харагдсан. Тэрхүү клиптэй төстэй ажлаас нь дурдахад төрийн далбааны давхар модон жааз хийлгэхэд 16 сая төгрөг төлжээ. Жааз хийлгэх гэрээнд дурдсанаар энэ нь “онцгой байдлын албанд нэн шаардлагатай” ажил болж таарсан байна. Уг нь аврагчдын хамгаалалтын хувцас хэрэгсэл л нэн шаардлагатай баймаар юм. Модон жаазнаас гадна төрийн далбааг есөн сая төгрөгөөр худалдаж авчээ. Түүнээс гадна онцгой байдлын алба нэгдсэн тогтолцоонд шилжсэний 20 жилийн ойн түүхэн баримтат кино хийх нь мөн нэн шаардлагатай ажлын нэг болжээ. Энэ киноны зохиол бичүүлэхэд л 13 сая төгрөг төлсөн байна. Дүнжингаравын эмгэнэлт явдлаас хойш элдэв хурал цуглаан ч нэлээд хийсэн байх юм. Үүнд ахлагч нарын, эмэгтэй ахлагч нарын чуулган гэгчийг зохион байгуулжээ. Дээр нь “Туушин” зочид буудалд 100 хүний хүлээн авалт хийсэн байна. Харин энэ бүхний ард аврагч нарыг хамгаалалтын хувцас хэрэгсэлээр хангах шоовдорлогдсон ажилд ердөө 15 сая төгрөг зарцуулжээ.

Сүүлийн таван сард Онцгой байдлын таван алба хаагч ажил үүргээ гүйцэтгэж яваад амиа алдлаа. Улсынхаа нийслэл Улаанбаатарт энх цагт амиа алдаж байна. Онцгой байдлын алба хаагч “5.7 сая төгрөгийн үнэтэй хүчилтөрөгчийн баг эвдэрвэл өөрөө төл гэдэг учраас гал руу орохдоо зүүдэггүй” гэжээ. Дарга нар нь энэ хэмжээний мөнгөөр кракул зах, малгай, савхин дээл аваад өмсчихдөг. Дээр нь том жийп хөлөглөнө. “Дарга нарын таргалсан, аврагчдын ядарсан хоёр яг тэнцсэн” газар болж дээ. Онцгой байдлын асуудал хариуцсан Шадар сайдын эмгэнэлийн үг нь бүр “эмгэнэл”-тэй арьсаа хамгаалсан, албан тушаалдаа хоргодсон шинжтэй. ОБЕГ-ын удирдлагуудыг өөрчилж, салхи оруулсан нь дээр болжээ.