Экс гишүүн А.Тлейхан ЭХЗХ-ны дарга болж, 24 саяар тавилга авчээ

Төсөв хэмнэх талаар хаа сайгүй ярьж байгаа үед төрийн байгууллага, удирдах албан тушаалтнууд тавилга ширээнд ч хамаагүй мөнгө зарсаар. Жил гаруй хоригдсон жирийн иргэд туйлдаж, өмссөн хувцсаа ч солихгүй, байгаа мөнгөө хүнс хоолондоо зарцуулна гэж гүрийж байгаа. Төр засаг ч иргэдийнхээ нөхцөл байдлыг мэдэж, ямархуу ядуу амьдардаг, амьдруулдагаа ойлгож байгаа бололтой барааны бүтээгдэхүүний зах, худалдааг нээхгүй байгаа. Гэтэл төрийн байгууллагын дарга нар шинэ машин худалдан авах, шинэ дарга сандалд суух хүсэл нь хэвээрээ байна. Энэ оны хавар А.Тлейхан даргатай Эрчим хүчний зохицуулах хорооны дарга нар дарга сандал ширээгээ сольжээ. Эрчим хүчний зохицуулах хорооны даргаар экс гишүүн А.Тлейхан ажилладаг. УИХ-д удаа дараа Баян-Өлгийгөөс сонгогдсон ч олигтой ажил хийх байтугай, гайгүй ганц нэг үг хэлээгүй, олон түмэнд танигдаагүй явсаар буусан. Гэсэн ч нэг агентлагийн дарга нэртэй маш өндөр цалин аваад чимээгүйхэн сууж байдаг. Эрчим хүчний зохицуулах хороо хоёр компаниас нийтдээ 24,2 сая төгрөгөөр худалдан авчээ. Мөн өрөөнүүддээ засвар хийлгэжээ. Дээрхи худалдан авалтаа Шилэн дансны мэдээлэлд “тавилганы үнэ” хэмээн оруулсан байна. Уг нь А.Тлейхан УИХ-аас унангуутаа төрийн байгууллагууд дундаа өндөр цалинтай гэгддэг Эрчим хүчний зохицуулах хорооны дарга болсон. УИХ-ын бүрэн эрхийн хугацаанаас илүү энд сууж байгаа нөхөр, сандал ширээ нь ч тэгтлээ муудчихаагүй байлтай.