Евро бүсийн орнуудад инфляц 6-р сард дунджаар 8.6% хүрээд байна. Бүсийн эдийн засагт инфляц хамгийн гол сорилт болоод буй тул Европын төв банк бодлогын хүүгээ 0.5 нэгж хувиар огцом өсгөлөө. Энэ нь төв банк сүүлийн 11 жилд хүүгээ анх удаа өсгөсөн тохиолдол болсон бөгөөд шинжээчдийн хүлээлтийг даваад байна.
Зах зээлийн хүлээлтээр Европын төв банк хүүгээ 0.25 нэгж хувиар өсгөнө гэсэн таамаг илүү давамгайлж байсан юм. Шийдвэрийг танилцуулсны дараа еврогийн ханш чангарч ам.долларын эсрэг $1.02 хүрчээ.
Тус банкны тэргүүн Кристин Лагард хэвлэлийн хурлын үеэр “Түлш шатахууны үнийн өсөлт инфляцыг голлон бүрдүүлж байна. Дэлхий дахинд түүхий эдийн үнэ ойрын хугацаандаа өндөр түвшинд хадгалагдахаар байгааг зах зээлийн үзүүлэлтүүд харуулж буй. Хүнсний үнэ ч мөн адил өсөж, 6-р сарын байдлаар 8.9% хүрээд байна” гэдгийг онцолжээ.
Мөн “Мөнгөний бодлогын шийдвэр нь инфляцын хүлээлтийг тогтворжуулж, эрэлтэд тохируулга хийснээр инфляцыг дунд хугацаанд зорилтот түвшинд хүргэж буулгахад дэмжлэг болно” гэсэн байна. Европын төв банк инфляцыг 2%-д тогтворжуулахыг зорьдог бөгөөд энэ оны турш инфляц зорилтоос нь нэлээд өндөр байх төлөвтэй байна.
Discussion about this post