Дэлхийн хамгийн том хөх алмааз Хонконг дахь “Sotheby’s” дуудлага худалдааны төвд болсон дуудлага худалдаагаар 450 сая хонконг.доллар буюу 57.5 сая ам.долларын үнэ хүрч зарагджээ.
Нийт 15.10 каратын жинтэй эрдэнийн чулууны дуудлага худалдаа найман минут үргэлжилсний эцэст 48 сая ам.долларт хүрсэн юм. Нэрээ нууцалсан худалдан авагч утсаар холбогдон дээрхи үнээр худалдан авсан гэж “Sotheby’s” төвөөс мэдээлжээ.
Энэ ховор алмаазыг Өмнөд Африкийн “Cullinan” уурхайгаас 2021 онд олборлосон бөгөөд өнгөт алмаазыг үнэлдэг хамгийн өндөр зэрэглэлд багтжээ. “Sotheby’s”-ийн мэдээлснээр, Америкийн Гемологийн хүрээлэн үүнийг “тансаг тод хөх” алмаазын ангилалд оруулсан нь хөх алмаазын нэгээс хэтрэхгүй хувийг эзэлдэг өнгө ажээ.
Мөн “Sotheby’s” энэхүү алмаазыг “туйлын ховор” хэмээн тодорхойлсон. Ингэхдээ 10 каратаас дээш хэмжээтэй 5-хан эрдэнийн чулуу дуудлага худалдаагаар зарагдаж байсныг эш татжээ. “The De Beers Cullinan Blue” нэртэй энэхүү чулууны эцсийн үнэ 57 471 960 ам.долларт хүрснээр хамгийн үнэтэй хөх алмаазад тооцогддог “Oppenheimer Blue” чулууныхаас /2016 онд 57 541 779 ам.доллароор зарагдсан/ 70 мянга хүрэхгүй ам.доллароор дутсан байна.
Discussion about this post