Даалин бэлэглэх уламжлал
1880-аад он, Өвөрхангай аймгийн Хайрхан дулаан сумын нутаг
Монгол охид бүсгүйчүүд хайртай хүндээ ур ухаанаа шингээн оёсон аяганы уут, хөөрөгний даалинг бэлэглэдэг эртний уламжлалтай. Монголын Үндэсний музейн сан хөмрөгт хадгалагдах нэгэн даалинг ханан хээтэй цэнхэр өнгийн торгоор урлан, улаан хоргойгоор халзлан оёж саан утас даруулан дөрвөн буланд нь хар торгон дээр буга согоог өнгийн утсаар зүү ороон оёж гоёжээ. Тус даалинг 1880-аад оны үед Өвөрхангай аймгийн Хайрхан дулаан сумын нутаг Гарьдын хадаар нутаглах ард Шаравцоодолд түүний гэргий Бүжмаа урлаж өгсөн түүхтэй. Даалингийн буланд эртний домог гардаг “Мөнхийн өвс” хэмээгдэх ногоон навч зуусан буга согоо хоёрыг өөд өөдөөсөө ирж буйгаар урлан хатгасан нь сэтгэлт хосуудын бэлгэдэл болсоор ирсэн юм. Буга согоо нь хүн төрөлхтний бүхий л түүхийн турш гоо үзэсгэлэн, ариун нандин хайрын бэлгэдэл болон мөнхөрчээ.
Discussion about this post