ОХУ-ын Ардын жүжигчин Олег Погудин Монголд тоглоно

МАРГААШ РЦНК буюу /Улаанбаатар дахь РУССКИЙ ДОМ-д Оросын сонгодог болон дэлхийн шилдэг романс  эгшиглэнэ. Саяхан тус газар 45 жилийнхээ ойгоор Оросын хамгийн содон тод хамтлагуудын нэг болох “Красная Горка”, Монголын folk-rock “Алтан ураг” хамтлагийн тоглолтыг Монгол үндэсний хувцсыг орчин үеийн уламжлалт хэв маягтай хослуулан “Торго” компаний зуу гаруй тансаг загварын шоугаар чимж зочдоо баярлуулсан. Одоо Алтан гадас одонт РЦНК буюу Улаанбаатар дахь Русский Дом нь монгол үзэгчиддээ удаах бэлгээ барих нь!

Учир нь маргааш буюу 2022 оны 1 дүгээр сарын 12-нд 19 цагт РЦНК-д  бид бүхний дуртай Оросын сонгодог (Глинка, Чайковский, Рахманинов) романсаас эхлэн “хотын романсууд” болон дэлхийн шилдэг романс, уянгын дуунууд ОХУ-ын Ардын жүжигчин Олег Погудины “Ая дуу биднийг холбоно” тоглолтод эгшиглэнэ.

ОХУ-ын Ардын жүжигчин Олег Погудин нь Царскосельскийн урлагийн шагналт, Оросын Холбооны Улсын Засгийн газрын шагналт, ОХУ-ын Ерөнхийлөгчийн дэргэдэх соёл, урлагийн Зөвлөлийн гишүүн мөн Бүх Оросын хамгийн том урлагийн наадам болох “Синяя птица” уралдааны шүүгч.

Тэрбээр Орос төдийгүй АНУ, Герман, Франц, Их Британи, Итали, Испани, Португали, Швед, Израиль зэрэг олон оронд уран бүтээлийнхээ 20 гаруй тоглолтыг толилуулсан юм. Түүний урын санг тоймловол, 19 зууны нэгдүгээр хагасаас 20 дугаар зууны дунд үе хүртэлх 100 орчим жилийн дотор зохиогдсон 500 гаруй романсуудыг дэлхийн 15 хэлээр дуулжээ.

Москва хийгээд оросын бяцхан хотуудын оршин суугчид, Парис, Берлин хотуудад ч үзэгчид уйлж, инээж, алга ташин хамтдаа дуулж, уярч, өнгөрсөн 25 жилийн хугацаанд түүнийг “Оросын мөнгөн дуу хоолой” хэмээн зүй ёсоор алдаршуулан тоглолтыг нь тэсэн ядан хүлээдэг юм.

Гайхамшигт хөгжимчдөөс бүрдсэн өөрийн ансамблийн хамт эгшиглэх “Ая дуу биднийг холбоно” тоглолт нь жүжигчний Монголын үзэгчидтэй хийх анхны уулзалт бөгөөд дэлгэцийн цаанаас үзэгчидтэйгээ шууд ярилцах алтан боломжийг олгох сайхан үзвэр болох нь гарцаагүй.

Тоглолтыг ирж саатан соёрхоно уу.