Ксения Собчакийн гэрийг нэгжив

Оросын сэтгүүлч, тв, сошиал од Ксения Собчакийн гэрт нэгжлэг хийлээ. Энэ эмэгтэй Анатолий Собчакийн охин. Аав нь Санкт-Петрбург хотын даргаар ажиллаж байсан ОХУ-ын ерөнхийлөгч Путин түүний цүнх баригч байсан гэж болно. 1990-ээд оны үед Путин түүний орлогч байж, улс төрийн карьерын эхлэлээ тавьжээ. Өчигдөр /2022.10.26/ Собчакийн охин Ксения Собчакийн гэрт Оросын мөрдөн байцаагчид  нэгжлэг хийсэн байна. Энэ үйл явдал улс төрийн хүрээнийхний дунд шуугиан тариад байна.

40 настай телевикийн од Собчак нь нэг үе аавынх нь шадар туслах байсан Путиныг байнга шүүмжилдэг. Гэсэн хэдий ч түүнийг Крмельд үйлчилдэг гэж Оросын сөрөг хүчнийхэн буруутгадаг. Оросын цуутай бүсгүйчүүдийн нэг Ксения Собчак 2018 онд ОХУ-ын ерөнхийлөгчийн сонгуульд өрсөлдөж дөрөвдүгээрт жагссан. Харин Ксения Собчакийн улс төрийн энэ үйлдлийг сонгуулийг ардчилсан өнгө аястай болгох гэсэн Путины арга гэж шүүмжилдэг. Санкт Петрбургээс гаралтай Собчакийн тансаг байшин Москвагийн захын дүүрэгт байдаг. Энд нэгжлэг хийсэн мөрдөн байцаагчид Собчакийн хэвлэлийн төлөөлөгч Кирилл Сухановын хууль бус үйлдлийг шалгах зорилгоор Собчакийн гэрийг нэгжсэн гэж мэдэгджээ. Кирилл Сухановыг бусдын эд хөрөнгө дээрэмдсэн хэргээр буруутгаж буй аж.

  Харин Ксения Собчак энэ хэргийг няцаасан бөгөөд хараат бус хэвлэл мэдээллийн хэрэгслийг боомилох гэсэн эрх баригчдын оролдлого гэжээ.

Мөрдөн байцаагчид Собчакийг хэвлэлийн ажилтан Сухановтой хамтарч, залилан мэхлэх ажиллагаанд оролцсон гэж сэжиглэж байна. ОХУ-ын төрийн мэдээллийн хэрэгслүүдээр Собчакийг эх орноосоо зугтсан гэж мэдээлсэн. Тухайлбал, Собчак эрх баригчдыг төөрөгдүүлэхийн тулд Дубай, Туркийн билет захиалсан боловч Беларусь руу явж, тэндээсээ Литва руу явсан гэв. Собчак чухам хаана байгаа нь одоогоор тодорхойгүй байгаа аж. Тэрбээр Оросын баячууд, хүчирхэг хүмүүстэй ойр дотно харилцаатай байдаг. Собчак инстаграмд 9.4 сая дагагчтай.

 20-иодхон настай үед нь Оросын Парис Хилтон гэж нэрлэдэг байсан. Түүний гэрт нэгжлэг хийсэн явдал нь Оросын улс төрийн элитүүдэд бүх найдлага тасарсан, амь амиа бодож, Путины савраас зугтаарай гэсэн дохиог өгсөн гэж улс төр судлаач Сергей Марков хэллээ.