БОАЖ-ын сайд Н.Уртнасан цөлжилтийг бууруулах ажлын хүрээнд Дорноговь аймагт ажиллаж, тус нутгийн нэн хүчтэй цөлжилт үүссэн хэсэгт 23000 мод тарьж ургуулаад байгаа Шамбала-2056 төслийн ажилтай танилцсан. 27-30 насны 10-аад залуус нэгдэж уг төслийг хэрэгжүүлж байгаа бөгөөд сайн дурын 108 гишүүнтэй төслийн баг өнгөрсөн хугацаанд мод үржүүлэг, хог хаягдлыг дахин боловсруулах чиглэлээр дагнан ажилласан туршлагатай. Гялгар уутыг дахин боловсруулж, эко ариун цэврийн байгууламжид зориулсан хөрсөнд нэвчилтгүй 1-10 тонн багтаамжтай танк үйлдвэрлэдэг, мод үржүүлгийн газар ажиллуулж байгаа гэхчлэн “тогтвортой хөгжлийн бодлогыг лоозон бус үйл хэрэг болгох” уриатай залуусын нэгдлийг онцгойлон анхаарч, дэмжин хамтран ажиллахаар боллоо.
Төслийн багтай ойжуулалтын бодлого хөтөлбөрийг сайжруулах, орчны бохирдлыг бууруулах, байгальд ээлтэй аялал жуулчлалыг хөгжүүлэх гэсэн үндсэн 3 чиглэлд хамтран юм. Эхний ээлжид “Зүгээр бүү хая” нөлөөллийн аяныг дэмжин, хамтран ажиллана.
“Өнгөрсөн хугацаанд найман аймагт албан томилолтоор ажиллаж, өрх бүрд мод тарих аяныг хэрэгжүүлж, цөлжилтийг сааруулах төсөл хөтөлбөрүүдийн судалгааны талбайд ажилласан. Мод тарих нь хэдхэн цагийн ажил, харин ургуулах нь хэдэн жилийн ажил болж байгааг анхааралдаа авлаа. Иймд мод тарих бус, ургуулах аяныг хамтран хэрэгжүүлнэ. Орчин үедээ нийцсэн санал, санаачилга салбарын хөгжилд хэрэгтэй. Иймээс тэдний туршлага, мэдлэгийг дэмжин олон залуусын түүчээ болгон хамтран ажиллахаар болж төслийн санаачлагч, үүсгэн байгуулагч Б.Шижирбатыг Байгаль орчин, ногоон хөгжлийн бодлогын орон тооны бус зөвлөхөөрөө томиллоо.
2021 онд ойн нормативыг шинэчлэн баталж, зардлын үнэлгээг 2.5-5 дахин нэмэгдүүлжээ. Энэ нь ойжуулалт, нөхөн сэргээлтийн үйл ажиллагаа эрхэлж байгаа, иргэн аж ахуй нэгжүүдэд чухал шийдвэр болсон. Шамбала-2056 төслийг цаашид тогтвортой үйл ажиллагаагаа явуулахад бодлогоор дэмжин ажиллахаар болжээ.
“2021 онд арчилгаа усалгаатай 50000 мод тарьж, шороо шуурсан Монголын говийг модод шуугисан төгөл болгож үлдээх” зорилгын хүрээнд хэцүү ч гэсэн шантралгүй урагшлах залуусын багийг дэмжин, хамтран ажиллахаар болсонд талархаж байгаагаа төслийн багийн ахлах, үүсгэн байгуулагч Б.Шижирбат илэрхийлээд, энэ хугацаандаа бодитоор үлдэх тоймтой ажил хийхээр төлөвлөж байгаагаа хэллээ.
Discussion about this post