Оогий: Намайг Австралийн бэр боллоо гэдэг. Үнэндээ Крис маань л Монголын хүргэн

О.Оюунцэцэг гэдэг бүсгүй Австралид амьдарч, “Оогий хийлс” болон “Оогий Эдү” хөтөлбөрийг үүсгэн байгуулагч, Австралийн “АйТи” компанийн Глобал пи ар захирал, Австрали Азийн бизнес консулын ТУЗ-ийн гишүүн, МҮОНТВ-ийн Австрали дахь сурвалжлагч гээд олон давхар ажилтай. Тэр тусмаа түүний “Оогий” брэндийн цүнх, гутал амжилттай зарагдаж байгаа.

Тэрээр цүнхнийхээ тухайд “Австралийн хамаг гоё СЕО бүсгүйчүүд энэ цүнхээр гангардаг. 4000,5000 ажилтантай хүчирхэг групийн эзэн бүсгүй ч шаргал үс, Оогий туфль-Оогий бизнес цүнхээрээ гангардаг. Зөвхөн Хэрмэс хэрэглэдэг эгч байлаа. Одоо OOGII болсон” гэж ярьж байлаа. Анх 20 гаруйхан насандаа монгол залууг сонгож, хүүгийн ээж болсон Оогий олон жил ганцаараа амьдарсан.

Харин одоо Австрали найз залуутай. Нөхрөө “Миний нөхөр ирээдүйн Австралийн Ерөнхий Сайд” гэдэг. Энэ тухайд “Крис бид хоёр хараахан гэрлээгүй байгаа. Одоо сүй тавиад дөрвөн жил гаруй болж байна. Хуримаа төлөвлөсөн байгаа. Маш өндөр боловсролтой, сайн эр хүн. Хүмүүс намайг Австралийн бэр боллоо л гээд байгаа. Үнэндээ Крис маань л Монголын хүргэн болоод байгаа юм шүү дээ. Монголыг гэсэн сэтгэлтэй, элэгтэй сайн залуу. Энд асуудалд орсон Монгол хүмүүст маань ч ямар ч ашиг харалгүй сэтгэлээсээ тусалдаг. Мэддэг хүмүүс нь хүндэлдэг юм аа. Тэр ирээдүйн ерөнхий сайд гэдгийг би хэлээгүй юм аа. Австралийн нэлээн нэр хүндтэй настай улстөрч тэгж хэлсэн. Би улс төрөөс хол байхыг эрмэлздэг. Гэхдээ хань ижил минь улс төрд орох шаардлагатай бол би бүх зүйлээр нь дэмжинэ” гэжээ.

Одоо Оюунцэцэг Монголд бага сургууль барьж байгаа. “Хань минь. Бүхий л зүйлийг минь дэмжиж, хайрлан, ойлгон, эрхлүүлж, хамгаалж, түшиг тулгуур минь болдог хань минь. Бүхий л зүйлийг хамтдаа хийдэг Australian Mongolian School -н Австрали дахь бүхий л ажлыг нугалж байгаа” гэж бахархжээ. Энэ бага сургуульд энэ 9 дүгээр сарын нэгэнд 100 хүүхэд элсэн суралцаж, ирэх 2025 онд Авсрали Монголын ахлах сургууль байгуулах гэнэ.