Мэргэжлийн сүмогийн дээд макүүчи зиндааны дөрвөн удаагийн аварга Тэрүнофүжи Г.Ган-Эрдэнийг өнөөдөр албан ёсоор ёкозүна цол хүртсэнийг зарлалаа. Ийнхүү дөрөв жил хагасын дараа сүмо ертөнцөд дахин нэгэн монгол ёкозүна төрж байна. Саяхан өндөрлөсөн Нагоя башёд 14 даваа, нэг унаатай үзүүрлэсэн Тэрүнофүжи 2017 онд Кисэносатога ёкозүна цол хүртсэнээс хойшхи энэ цолонд хүрсэн анхны бөх болж байна.
Японы сүмогийн холбооны удирдах зөвлөлийн гишүүд өнгөрсөн Даваа гаригт ээлжит бус хурлаа хийж, 29 настай Тэрүнофүжид 100 хувийн саналаар ёкозүна цол хүртээхийг дэмжжээ.
Тэрбээр хоёр өвдгөндөө хүнд бэртэл аван 2019 оны гуравдугаар сард тавдугаар зиндаа болох жонидан хүртэл чансаа буурч байсан билээ. Гэвч Тэрүнофүжи эргэн ирж, гайхалтай сайн барилдсаар ёкозүна цолтон боллоо.
Discussion about this post